وزیر داخلہ سندھ ضیا الحسن لنجار نے کچے میں ڈاکوئوں کیخلاف بڑے آپریشن کا اعلان کرتے ہوئے کہا ہے کہ کچے میں آپریشن کیلئے فی الحال فوج کی ضرورت نہیں، اپنے آپ کو چمپئن سمجھنے والوں کیخلاف سخت کارروائی، ہتھیار ڈالنے والوں کو موقع دیا جائے گا۔
سکھر میں آئی جی سندھ کے ہمراہ صحافیوں سے گفتگو کرتے ہوئے وزیر داخلہ سندھ نے کہا کہ کچے میں ڈاکوئوں کیخلاف بڑے آپریشن کا فیصلہ کیا ہے جس میں ڈاکوئوں کے خلاف بے رحمانہ کارروائی کی جائے گی۔
انہوں نے کہا کہ سندھ پولیس کے ساتھ رینجرز بھی آپریشن میں حصہ لے گی تاہم فی الحال ابھی فوج کی ضرورت نہیں ہے۔
انہوں نے کہا کہ آپریشن میں پنجاب پولیس کی بھی ضرورت پڑے گی، آئی جی سندھ کو آئی جی پنجاب سے رابطے کا کہا ہے۔
انہوں نے کہا کہ آپریشن کے دوران خود کو چمپئن سمجھنے والے ڈاکوئوں کیخلاف سخت کارروائی کی جائیگی تاہم ہتھیار ڈالنے والوں کو موقع دیا جائے گا۔
انہوں نے بتایا کہ ڈاکوئوں کے سہولت کاروں کے خلاف بھی کارروائی کی جارہی ہے۔
انہوں نے کہا کہ قبائلی جھگڑوں کے خاتمے کیلئے بھی کام کررہے ہیں،امید ہے جلد جتوئی مہر تکرار بھی ختم ہوجائے گا۔
انہوں نے کہا کہ صوبے میں امن و امان کی صورتحال پہلے سے بہت بہتر ہے جس میں جلد مزید بہتری آئے گی۔
