خیبرپختونخوا حکومت نے زیر التواء ڈرائیونگ لائسنسز کا اجرا ایک ماہ میں یقینی بنانے کا فیصلہ کرلیا۔
محکمہ ٹرانسپورٹ خیبرپختونخوا کے مطابق صوبہ بھر میں اس وقت ایک لاکھ 17ہزار 190افراد ڈرائیونگ لائسنس کے انتظار میں ہیں، سب سے زیادہ لائسنس سوات میں جاری کئے جانے ہیں جہاں منتظر افراد کی تعداد 16ہزار 996ہے۔
حکام کے مطابق ہری پور میں 9ہزار 945، پشاور میں 9ہزار 700، مردان میں 8ہزار 697، دیر میں 7ہزار 965 جبکہ ایبٹ آباد میں 6ہزار 864 افراد کو لائسنس جاری کئے جانے ہیں۔
محکمہ ٹرانسپورٹ کے مطابق بروقت لائسنس نہ ملنے سے شہریوں کو مشکلات کا سامنا تھا جس کے پیش نظر اب باقاعدہ شیڈول کے تحت لائسنس چھپائی کا عمل شروع کیا جا رہا ہے۔
سیکرٹری محکمہ ٹرانسپورٹ محمد زبیر نے بتایا ہے کہ یکم جنوری سے 30 جنوری تک تمام زیر التوا کیسز کو حل کیا جائیگا جس کے بعد ڈرائیونگ لائسنس کے اجرا کا عمل معمول کے مطابق ہوگا۔
