وزیراعظم شہباز شریف نے دنیا بھر کی مسیحی برادری کو کرسمس کی مبارکبا دیتے ہوئے کہا ہے کہ کرسمس پوری انسانیت کو جوڑنے کا پیغام دیتا ہے، حضرت عیسیٰ علیہ السلام کا پیغامِ امن آج بھی انسانیت کیلئے مشعل راہ ہے، مسیحی برادری کی قومی ترقی میں خدمات قابل تحسین، دہشت گردی کیخلاف قربانیاں باعث فخر ہیں، حکومت تمام شہریوں کے مساوی حقوق اور مواقع کی ضامن، تمام مذاہب مل کر خوشحال اور محفوظ پاکستان کی تعمیر کرتے رہیں گے۔
کرسمس پر جاری بیان میں وزیراعظم نے کہا کہ کرسمس کے پرمسرت اور بابرکت موقع میں عوام اور حکومت پاکستان کی جانب سے دنیا بھر اور بالخصوص پاکستان میں بسنے والی مسیحی برادری کو دلی مبارکباد پیش کرتا ہوں، تمام اہل وطن کو اس تہوار کی روایتی خوشیاں مبارک ہوں۔
انہوں نے کہا کہ کرسمس نہ صرف مسیحی برادری کا جشن و تقریبات پر مشتمل مذہبی تہوار ہے بلکہ یہ پوری انسانیت کیلئے پیغام محبت، امن و رواداری اور خیر سگالی کے جذبات سے ہمیں ایک دوسرے سے جوڑتا ہے۔
انہوں نے کہا کہ حضرت عیسیٰ علیہ السلام اللہ تعالی کے جلیل القدر پیغمبر کی حیثیت سے اسلام میں نہایت محترم مقام رکھتے ہیں، انہوں نے پوری انسانیت کیلئے امن، بھائی چارے اور محبت کا پیغام دیا اور لوگوں کو نیکی، تقوی اور پاکیزہ طرز زندگی کی تلقین کی۔
وزیراعظم نے مسیحی برادری کے پاکستان میں فعال، مثبت اور پر امن برادری کی حیثیت سے قابل قدر کردار کو سراہتے ہوئے کہا کہ ملک کی مجموعی سماجی و معاشی ترقی کیلئے ان کی مخلصانہ کاوشیں تحسین کے لائق ہیں۔
انہوں نے دہشت گردی کیخلاف جدوجہد میں قوم کے شانہ بشانہ مسیحی برادری کی قربانیوں کو باعث فخر قرار دیتے ہوئے کہا کہ مسیحی برادری کی تعلیم، طب اور دیگر شعبہ ہائے زندگی میں بھی گرانقدر خدمات سماجی ہم آہنگی کے فروغ کا باعث ہیں۔
انہوں نے کہا کہ تمام شہریوں کیلئے بلا تفریق رنگ و نسل باہمی ہم آہنگی، حقوق و آزادی کا تحفظ، معاشی آسودگی، پیشہ ورانہ ترقی کے یکساں مواقع حکومت پاکستان کی ترجیحات میں شامل ہیں۔
وزیراعظم نے کہا کہ آج خوشیوں بھرے دن پر تجدید عہد کرنا ہوگا کہ سب طبقات و مذاہب مل کر آنیوالی نسلوں کیلئے مضبوط، محفوظ اور خوشحال پاکستان کیلئے تعمیری کرادر ادا کرتے رہیں گے۔
