لاہور ہائیکورٹ نے بلدیاتی ایکٹ 2025ء کیخلاف درخواستوں پر فریقین سے مزید دلائل طلب کرتے ہوئے ریمارکس دیئے ہیں کہ اسمبلی فلور اہمیت کا حامل، وہاں سے کسی ادارے کو ٹارگٹ نہیں کیا جانا چاہئے، وقت آ گیا تمام ادارے ایک دوسرے کا احترام کریں، ملک کو آگے بڑھنا، اداروں کو سیکھنا چاہئے۔
بدھ کو لاہور ہائیکورٹ میں جسٹس سلطان تنویر نے بلدیاتی ایکٹ 2025ء کیخلاف دائر درخواستوں پر سماعت کی۔
درخواست گزاروں کے وکلا نے مو قف اپنایا کہ بلدیاتی ایکٹ 2025ء کی متعدد شقیں آئین سے متصادم ہیں، عدالت قانون کو کالعدم قرار دے۔
ایڈووکیٹ جنرل آفس نے خصوصی نوٹس کا جواب جمع کرایا۔
اسسٹنٹ ایڈووکیٹ جنرل بیرسٹر سعد غازی نے موقف اپنایا کہ بلدیاتی ایکٹ 2025ء میں ایسی کوئی پابندی موجود نہیں جس کے تحت امیدوار پارٹی ٹکٹ پر الیکشن میں حصہ نہ لے سکیں۔
دوران سماعت جسٹس سلطان تنویر نے ریمارکس دیئے کہ اسمبلی فلور کی بہت اہمیت ہوتی ہے، وہاں سے کسی ادارے کو ٹارگٹ نہیں کیا جانا چاہئے، اب وقت آ گیا ہے تمام ادارے ایک دوسرے کا احترام کریں، ہم آپ کا احترام کریں گے، آپ ہمارا احترام کریں، پاکستان کو آگے بڑھنا اور اداروں کو سیکھنا چاہئے کہ باہمی احترام لازم ہے۔
عدالت نے واضح کیا کہ قانون سازی پارلیمنٹ کا اختیار ہے، عدالت آئین کے دائرے میں رہتے ہوئے ہی فیصلہ کرے گی، چاہتے ہیں کیس کا فیصلہ بلدیاتی انتخابات سے قبل ہو جائے۔
بعدازاں عدالت نے درخواست گزاروں کے وکلا کو مزید دلائل دینے کی ہدایت کرتے ہوئے سماعت ملتوی کردی۔
