غزہ میں بے گناہ اور نہتے فلسطینیوں کیخلاف اسرائیلی فوج کی کارروائیاں جاری ہیں، مقبوضہ مغربی کنارے میں ایک اور پرتشدد کارروائی کرتے ہوئے اسرائیلی فورسز نے کم از کم 24 فلسطینیوں کو زخمی کر دیا ہے۔
طبی ذرائع کے مطابق یہ خونریز چھاپہ قلانڈیا پناہ گزین کیمپ اور کفر عقب کے قصبے میں مارا گیا جو مقبوضہ مشرقی یروشلم کے شمال میں واقع ہیں، فلسطینی ریڈ کریسنٹ سوسائٹی نے اپنے بیان میں بتایا کہ طبی عملے نے اسرائیلی فوجی کارروائی کے دوران زخمی ہونیوالے 24 افراد کو طبی امداد فراہم کی، زخمیوں میں تین افراد کو براہِ راست گولیوں کا نشانہ بنایا گیا جن میں ایک 15 سالہ فلسطینی لڑکا بھی شامل ہے جسے ران میں گولی ماری گئی۔
غیر ملکی میڈیا کے مطابق اسرائیلی افواج نے منگل کی صبح سویرے قلانڈیا کیمپ اور کفر عقب پر دھاوا بولا، کارروائی کے دوران فوجی بلڈوزر استعمال اور درجنوں فوجی مرکزی شاہراہوں اور رہائشی علاقوں میں تعینات کر دئیے گئے، چھاپے کے دوران شیلنگ، سٹن گرینیڈز اور آنسو گیس کا بے دریغ استعمال کیا گیا جس کے باعث علاقے میں شدید خوف و ہراس پھیل گیا، اسرائیلی فوج نے چار گھروں کے مکینوں کو زبردستی نکال کر انکو فوجی چوکیوں میں تبدیل کر دیا۔
