اسرائیل کی جانب سے فلسطین کے مغربی کنارے میں 19 نئی یہودی بستیوں کی منظوری کے بعد برطانیہ بھی میدان میں آگیا ہے اور برطانوی لبرل ڈیموکریٹس نے اسرائیلی کابینہ اراکین پر فوری پابندیاں لگانے کا مطالبہ کر دیا ہے، کالم ملر نے کہا کہ نیتن یاہو کی انتہا پسند کابینہ دو ریاستی حل کو ناکام بنارہی ہے، فلسطینی زمین پر بستیوں کی توسیع پر محض مذمت نہیں بلکہ برطانوی حکومت عملی اقدامات کرے، صہیونی بستیوں کی مصنوعات پر پابندی لگائی جائے، برطانیہ میں درآمد بند کی جائے۔
لبرل ڈیموکریٹس کا کہنا تھا کہ بین الاقوامی عدالت کے فیصلے کے بعد برطانیہ کی خاموشی ناقابل قبول ہے، مغربی کنارے کی صورتحال پر عالمی تشویش بڑھ گئی ہے، صیہونی بستیوں میں اضافہ خطے میں امن کیلئے سنگین خطرہ ہے، انکا کہنا تھا کہ فوری اقدامات نہ کئے گئے تو مشرق وسطی میں بحران مزید بڑھے گا۔
