امریکی عدالت نے ٹیسلا کے سربراہ ایلون مسک کے تقریباً 139 ارب ڈالر مالیت کے 2018 کا تنخواہی پیکج بحال کر دیا ہے۔
غیر ملکی میڈیا کے مطابق ریاست ڈیلاویئر کی سپریم کورٹ کے فیصلے سے قبل ایک نچلی عدالت نے پیکج کو ناقابل تصور قرار دیکر منسوخ کر دیا تھا تاہم سپریم کورٹ نے اسکو غیر منصفانہ قرار دیتے ہوئے کالعدم کر دیا اور اپنے فیصلے میں کہا کہ تنخواہی پیکج کی مکمل منسوخی ایلون مسک کیلئے ناانصافی تھی کیونکہ وہ گزشتہ چھ سال کے دوران ٹیسلا کیلئے نمایاں خدمات انجام دے چکے ہیں، فیصلے سے مسک کو انکی محنت کا معاوضہ نہیں مل رہا تھا، یہ تنخواہی پیکج ٹیسلا کے شیئرز پر مبنی ہے جس کے تحت ایلون مسک کمپنی کے اہداف پورے ہونے پر بڑے پیمانے پر سٹاک آپشنز حاصل کر سکتے ہیں، اگرو ہ تمام آپشنز استعمال کرتے ہیں تو ٹیسلا میں انکی حصص داری 12سے بڑھ کر 18فیصد سے زائد ہو سکتی ہے، فیصلے کے بعد ایلون مسک نے سوشل میڈیا پلیٹ فارم ایکس پر ردعمل دیتے ہوئے کہا وہ خود کو سرخرو محسوس کر رہے ہیں تاہم اس پیکج کو چیلنج کرنیوالے وکلاء نے اعلان کیا ہے کہ وہ آئندہ قانونی راستے اختیار کرنے پر غور کر رہے ہیں۔
ماہرین کے مطابق فیصلے سے ٹیسلا میں ایلون مسک کا کنٹرول مزید مضبوط ہو جائیگا جو ان کیلئے مالی فائدہ سے زیادہ اہم سمجھا جاتا ہے۔
