پاکستان کرکٹ بورڈ نے پی ایس ایل سیزن 11 کیلئے غیر ملکی کھلاڑیوں کی رجسٹریشن کا آغاز کردیا ہے جس کیلئے آخری تاریخ 20 جنوری 2026 مقرر کی گئی ہے۔
پی سی بی کا کہنا ہے کہ ایچ بی ایل پی ایس ایل الیون 26مارچ سے 3مئی 2026 تک کھیلا جائیگا جس کیلئے دو نئی ٹیموں کی نیلامی 8 جنوری کو اسلام آباد میں ہوگی، نئی فرنچائزز کی نیلامی براہ راست نشر کی جائیگی، دو نئی فرنچائزز کے اضافے سے پی ایس ایل میں ٹیموں کی تعداد 8 ہو جائیگی، مزید ٹیموں اور میچز سے کھلاڑیوں کیلئے زیادہ مواقع پیدا ہونگے۔
یاد رہے کہ پاکستان سپر لیگ 11 کا شیڈول جاری کردیا گیا ہے، پی ایس ایل کے نئے سیزن میں 44 میچز کھیلے جائیں گے، ہر ٹیم کو کم سے کم 10 میچز کھیلنے کو ملیں گے۔
