معاون خصوصی وزیراعظم برائے سیاسی امور سینیٹر رانا ثنا اللہ نے اپوزیشن کو پھر مذاکرات کی دعوت دیتے ہوئے کہا ہے کہ جمہوریت ہمیشہ مذاکرات سے آگے بڑھتی ہے، ڈیڈلاک اسے کمزور کرتا ہے، ایسی ملاقاتیں جن سے ریاستی امن و امان متاثر ہوکی اجازت نہیں دی جا سکتی، پی ٹی آئی والے جن سے مذاکرات کے خواہاں ہیں وہ کرنا نہیں چاہتے۔
جمعہ کو سینیٹ اجلاس میں اظہار خیال کرتے ہوئے رانا ثناء اللہ نے کہا کہ وزیراعظم دوبارا یوان میں اپوزیشن کو میثاق استحکامِ جمہوریت کیلئے مذاکرات کی دعوت دے چکے ہیں، حتی کہ انہوں نے یہ بھی پیشکش کی کہ اپوزیشن سپیکر چیمبر میں بات کرنا چاہتی ہے تو خود وہاں آجائوں گا مگر یہ مذاکرات نہیں کرتے۔
انہوں نے کہا کہ جمہوریت مذاکرات سے آگے بڑھتی ہے ڈیڈ لاک اسے کمزور کرتا ہے۔
انہوں نے کہا کہ جیل ملاقاتیں مکمل طور پر قانون اور انصاف کے مطابق ہوتی ہیں، قانون کسی قیدی کو یہ اجازت نہیں دیتا کہ وہ جیل میں بیٹھ کر امن و امان صورتحال خراب کرنے کی کوشش کرے، بانی نے بہن سے ملاقات میں خاندانی معاملات پر گفتگو نہیں بلکہ امن و امان میں خلل ڈالنے اور پارٹی معاملات میں مداخلت کرنے کی ہدایات دیں، یہ بات آن ریکارڈ ہے کہ بانی پی ٹی آئی نے کہا ہے کہ وہ حکومت سے بات کرنے کو تیار نہیں جبکہ جن سے وہ بات کرنا چاہتے ہیں وہ ان سے بات پر آمادہ نہیں۔
انہوںنے کہا کہ حکومت کا اصولی مو قف ہے کہ تمام ملاقاتیں قانون کے مطابق ہونی چاہئیں ،ایسی ملاقاتیں جن سے ریاستی امن و امان متاثر ہوکی اجازت نہیں دی جا سکتی۔ انہوںنے اپوزیشن کو پھر بات چیت کی دعوت دیتے ہوئے کہا کہ مذاکرات کا راستہ آج بھی کھلا ہے، اگر اس معاملے پر کمیٹی بنانی ہے تو کمیٹی بنا کر طے کرلیں کہ کیا بات کرنی ہے۔
