وفاقی دارالحکومت میں ڈانس پارٹیوں اور مساج سینٹروں کے نام پر فحاشی کے اڈوں کیخلاف اسلام آباد پولیس حرکت میں آگئی اور مساج سینٹرز اور فحاشی کے اڈوں کے خاتمے کیلئے کریک ڈائون کیا جبکہ تھانہ شالیمار پولیس نے ایک ہی رات میں 5 چھاپے مار کر 21 لڑکیوں اور 19 مردوں کو گرفتار کرلیا۔
ذرائع کے مطابق پانچ میں سے 3 قحبہ خانے ابوظہبی ٹاور میں پکڑے گئے جہاں روز پیلس اور نیچرل راکس نامی مساج سنٹروں میں جسم فروشی کا دھندہ بھی ہورہا تھا۔
ادھر گرفتار ملزمان نے ڈانس پارٹیوں اور مساج سنٹروں کی آڑ میں جسم فروشی کے دھندے کا اعتراف کیا جبکہ گرفتار لڑکیوں نے علی ملک نامی لڑکے پر لڑکیوں کو 4 ہزار روپے دیکر دھندہ کروانے کا الزام لگایا۔
ذرائع کے مطابق رہائشی فلیٹس میں جسم فروشی کا دھندہ کروانے والا ملزم علی ملک فرار ہونے میں کامیاب ہوگیا جبکہ گرفتار لڑکیوں اور لڑکوں کیخلاف تھانہ شالیمار میں مقدمات درج کرلئے گئے۔
ذرائع نے انکشاف کیا کہ مساج سینٹروں اور قحبہ خانوں سے گرفتار لڑکیوں کو چھڑوانے کیلئے سفارشیوں کی فون کالز کا رات بھر تانتا بندھا رہا، بڑے بڑے معززین، اور شرفاء لڑکیوں کو چھڑوانے کیلئے پولیس پر دبائو ڈالنے کی کوشش کرتے رہے۔
