وزیراعظم کے مشیر برائے سیاسی امور رانا ثناء اللہ نے کہا ہے کہ آئی ایم ایف شرائط کے باعث عوام کو ریلیف نہیں دے پا رہے، جھوٹے مقدمات اور نفرت کا نتیجہ بہتر نہیں نکلتا، ہری پور ضمنی الیکشن میں کامیابی پر حیرانی ہوئی، ملک کی ترقی اولین ترجیح ہے۔
نجی ٹی وی سے گفتگو کرتے ہوئے رانا ثناء اللہ نے کہا کہ 2017میں مہنگائی 3 فیصد تھی جو 4 سال میں 40 فیصد پر گئی، ہم لوگوں کو ریلیف دینا چاہتے ہیں لیکن آئی ایم ایف شرائط کی وجہ سے نہیں دے پا رہے، پروگرام کی تکمیل پر ہی عوام کو ریلیف دے سکیں گے۔
انہوں نے کہا کہ ہری پور کے ضمنی الیکشن میں کامیابی پر خوشی بھی ہوئی اور حیرانی بھی، وزیراعلی سہیل آفریدی ہری پور میں مہم چلا رہے تھے اور دھمکیاں بھی دے رہے تھے۔
انہوں نے کہا کہ جھوٹے مقدمات، گالم گلوچ، نفرت جیسے معاملات کا نتیجہ بہتر نہیں نکلتا، ہماری اولین ترجیح ہے کہ ملک آگے بڑھے، ترقی کرے اور لوگوں کیلئے آسانی ہو، جن لوگوں نے ماضی میں ملک کو نقصان پہنچایا ان کے حساب کا وقت آسکتا ہے، ملک کی تباہی کرنے والوں سے جواب طلبی میں وقت ضائع کیا جائے یا بہتری کیلئے کام کیا جائے۔
انہوں نے کہا کہ فی الحال ملک کی بہتری کیلئے کام ہونا چاہئے، ان لوگوں کا حساب بعد میں بھی ہوسکتا ہے۔
