اسلام آباد: اقوام متحدہ کی سلامتی کونسل نے خضدار سکول بس پر دہشت گرد حملے کی مذمت کرتے ہوئے کہا ہے کہ دہشت گردی کسی بھی صورت اور مقصد سے جائز نہیں ہو سکتی۔جاری بیان میں سلامتی کونسل نے جاں بحق افراد کے لواحقین سے ہمدردی و تعزیت جبکہ زخمیوں کی جلد صحتیابی کیلئے نیک تمناؤں کا اظہار کیا ہے۔
سلامتی کونسل نے کہا کہ حملے میں 4بچوں سمیت 6پاکستانیوں کاجاں بحق اور 53 کا زخمی ہونا قابل افسوس ہے، حملہ بزدلانہ و قابل نفرت فعل ہے۔ بیان میں کہا گیا ہے کہ دہشت گردی عالمی امن و سلامتی کیلئے بڑا خطرہ ہے، ذمہ داران ،مالی مدد گاروں اور منصوبہ سازوں کو انصاف کے کٹہرے میں لایا جائے۔
سلامتی کونسل نے عالمی قانون اور اقوام متحدہ کے منشور کے مطابق دہشت گردی کے خاتمے پر زور دیتے ہوئے کہا کہ تمام ریاستیں پاکستان سے تعاون کریں، دہشت گردی کسی بھی صورت اور مقصد سے جائز نہیں ہو سکتی۔
