اقوام متحدہ(شِنہوا)چین نے اقوام متحدہ میں کہا ہے کہ غزہ میں پائیدار جنگ بندی کا حصول سب سے بڑی ترجیح ہے۔
اقوام متحدہ میں چین کے مستقل مندوب فوتسونگ نے کہا کہ چین غزہ میں جنگ بندی کے پہلے مرحلے کے معاہدے کو خوش آئند قرار دیتا ہے تاہم فلسطین اور اسرائیل کے درمیان امن کا قیام ابھی بہت دور ہے اور شہریوں کی مشکلات جاری ہیں۔
انہوں نے سلامتی کونسل میں چین کی تشویش کا اظہار کیا کہ جنگ بندی کے باوجود پرتشدد جھڑپیں جاری ہیں۔ انہوں نے کہا کہ اسرائیل نے مبینہ طور پر معاہدے کی 400 سے زیادہ خلاف ورزیاں کی ہیں، جس کے نتیجے میں غزہ میں 300 سے زائد شہری شہید ہو چکے ہیں۔
فو نے کہا کہ جنگ بندی کا مطلب ہے تمام حملوں کا مکمل خاتمہ اور اسے تمام فریقین کو خلوص نیت کے ساتھ ماننا چاہیے۔ کسی بھی واقعے میں شہریوں کو نقصان پہنچانا قابل قبول نہیں اور بار بار حملے غزہ میں نئے معمول کا حصہ نہیں بننے چاہئیں۔ انہوں نے مزید کہا کہ چین تمام متعلقہ فریقین، خاص طور پر اسرائیل سے مطالبہ کرتا ہے کہ وہ جنگ بندی کے معاہدے کی مکمل پاسداری کرے اور حقیقی جامع اور پائیدار امن کے قیام کی کوشش کرے۔
چینی مندوب نے بتایا کہ غزہ میں انسانی حالات اب بھی انتہائی سنگین ہیں اور انسانی امداد تک رسائی کئی رکاوٹوں کا سامنا کر رہی ہے۔ انہوں نے کہا کہ چین اسرائیل سے مطالبہ کرتا ہے کہ وہ بین الاقوامی انسانی قوانین کے تحت اپنی ذمہ داریوں کو پورا کرے، تمام گزرگاہیں کھولے، انسانی امداد پر پابندیاں ختم کرے اور اس بات کو یقینی بنائے کہ فلسطینی پناہ گزین کے لئے اقوام متحدہ کی ریلیف اینڈ ورکس ایجنسی اور دیگر انسانی ادارے اپنی امدادی کارروائیاں انجام دے سکیں۔
انہوں نے کہا کہ غزہ کے لئے مستقبل کے کسی بھی انتظامات میں فلسطینی عوام کی حکومت اور ان کی رائے کا احترام لازمی ہونا چاہیے۔ بین الاقوامی برادری کو دو ریاستی حل کو آگے بڑھانے کی کوششیں دگنی کرنی چاہئیں اور اس بنیاد کو نقصان پہنچانے کے کسی بھی یک طرفہ اقدام کی مخالفت کرنی چاہیے اور آزاد فلسطینی ریاست کے جلد قیام اور اقوام متحدہ کی مکمل رکنیت کی حمایت کرنی چاہیے۔
انہوں نے کہا کہ چین نے ہمیشہ فلسطینی عوام کے جائز قومی حقوق کی بحالی کے انصاف پسندانہ مقصد کی بھرپور حمایت کی ہے۔ انہوں نے مزید کہا کہ چین فلسطینی مسئلے کے جلد، جامع، منصفانہ اور پائیدار حل کے حصول کو آگے بڑھانا جاری رکھے گا۔
