پنجاب کے صوبائی الیکشن کمشنر نے فیصل آباد میں ضمنی انتخابات کے حوالے سے میڈیا پر چلنے والی خبر کو سراسر جھوٹ اور پروپگینڈا پر مبنی قرار دیتے ہوئے اس کا فوری نوٹس لیا ہے اور ڈسٹرکٹ ریٹرننگ افیسر اور ریٹرننگ افسران کو تحقیقات کی ہدایات کی ہے۔
ترجمان نے کہا کہ تمام انتظامات مکمل طور پر درست تھے اور انتخابی سامان کی ترسیل کی نگرانی ڈسٹرکٹ ریٹرننگ افسر، ریٹرننگ افسران، ڈسٹرکٹ مانیٹرنگ افسر اور الیکشن کمیشن کے افسران کی زیر نگرانی کی گئی، انتخابی سامان کی ترسیل کیلئے خاطر خواہ تعداد میں ٹرانسپورٹ کا بندوبست کیا گیا تھا اور تمام پریزائڈنگ افسران کو انتخابی سامان کیساتھ سیکیورٹی اہلکاروں کی موجودگی میں متعلقہ پولنگ سٹیشنز تک پہنچایا گیا تھا۔
انہوں نے کہا کہ چینل پر دکھائی جانیوالی تصاویر غیر واضح اور حقیقت سے عاری تھیں جو عوام کو گمراہ کرنے کیلئے نشر کی گئیں۔
صوبائی الیکشن کمشنر پنجاب نے میڈیا سے گزارش کی ہے کہ کسی بھی خبر کو بغیر تصدیق کیے نشر نہ کیا جائے اور عوام کی درست آگاہی کیلئے صرف مستند اطلاعات پر انحصار کیا جائے۔
