وزیراعظم شہباز شریف نے کاروباری افراد کی صنعتی ترقی بارے سفارشات وتجاویز کا خیر مقدم کرتے ہوئے بغور جائزے کے بعد قومی پالیسی فریم ورک میں شامل کرنے کی ہدایت کرتے ہوئے کہا ہے کہ معاشی ترقی، روزگار کی فراہمی اور آمدن میں اضافہ صنعتی ترقی کے بغیر ممکن نہیں، کاروبار میں آسانی و سرمایہ کاری میں اضافے کیلئے اقدامات حکومت کی اولین ترجیحات ہیں۔
جمعہ کو جاری بیان کے مطابق وزیراعظم شہباز شریف کی زیر صدارت ملکی صنعتی ترقی پر قائم نجی شعبے کی کمیٹی کا پہلا جائزہ اجلاس ہوا جس میں وفاقی وزراء احسن اقبال، جام کمال خان، احد خان چیمہ، علی پرویز ملک، وزیر اعظم کے مشیر محمد علی، وزیر مملکت بلال اظہر کیانی، معاون خصوصی ہارون اختر اور ثاقب شیرازی کی قیادت میں صنعتی ورکنگ گروپ میں شامل صنعتکاروں نے شرکت کی۔
اجلاس میں صنعتی ترقی کے حوالے سے سفارشات اور ملکی صنعت کی مسابقت میں اضافے کیلئے خطے کے ممالک سے موازنہ پیش کیا گیا۔
وزیراعظم نے سفارشات و تجاویز کا خیر مقدم کرتے ہوئے کہا کہ ملکی معاشی ترقی، روزگار کی فراہمی اور آمدن میں اضافہ صنعتی ترقی کے بغیر ممکن نہیں۔
وزیراعظم نے سفارشات و تجاویز کو قومی پالیسی فریم ورک میں شامل کرنے کی ہدایت کرتے ہوئے کہا کہ کاروبار میں آسانی اور سرمایہ کاری میں اضافے کیلئے اقدامات حکومت کی اولین ترجیحات ہیں، ملکی صنعتی ترقی کیلئے نجی شعبے کی تجاویز کلیدی اہمیت رکھتی ہیں۔
انہوں نے کہا کہ کاروباری حضرات کی جانب سے صنعتی ترقی کیلئے عرق ریزی سے تیار تجاویز لائق تحسین ہیں، ان کا بغور مشاہدہ کرکے عملدرآمد کا لائحہ عمل تیار کیا جائیگا۔
وزیراعظم نے کہا کہ پاکستانی کاروباری برادری نے مشکل وقت میں حکومتی پالیسیوں کا ساتھ دیا اور ملک کو معاشی بحرانوں سے نکالنے میں معاونت کی، اللہ کے فضل سے ملکی معاشی سمت بہتر اور ملک ترقی کی جانب گامزن ہے، تاہم ملکی ترقی کیلئے ہمیں مزید محنت کرنا ہوگی۔
