معروف اداکارہ اور ماڈل نازش جہانگیر نے انکشاف کیا ہے کہ میں کچھ بھی کہہ دوں اسے تنازع بنا دیا جاتا ہے، حالانکہ ایسی باتوں سے مجھے کوئی فائدہ حاصل نہیں ہوتا، بار بار بے وجہ تنازعات میں گھسیٹنے کے باعث میں خود کو کبھی کبھی پاکستانی کنگنا رناوت محسوس کرنے لگتی ہوں۔
ایک بیان میں انہوں نے کہا یہ عام تاثر غلط ہے کہ تنازعات سے کسی اداکارہ کے کیریئر کو تقویت ملتی ہے، تنازع سے کیریئر نہیں بنتا، کبھی بھی کسی ایک بھی تنازع نے مجھے کوئی اضافی کام یا موقع فراہم نہیں کیا۔
مسلسل تنازعات اور بے بنیاد باتیں سن کر مجھے اکثر ایسا لگتا ہے کہ جیسے میں پاکستان کی کنگنا رناوت بن گئی ہوں جو بولڈ بیانات اور تنازعات کے باعث خبروں میں رہتی ہیں، مجھے تنازع سے نفرت ہے کیونکہ ایک بار بات پھیل جائے تو اسے کنٹرول کرنا تقریبا ناممکن ہو جاتا ہے، میں ہر غلط فہمی کی وضاحت نہیں کر سکتی اور نہ ہی ہر شخص کو سچائی سمجھا سکتی ہوں۔
انہوں نے کسی کا نام لئے بغیر بتایا کہ مجھ سے جڑی ایک بڑی اور مشہور کنٹروورسی صرف اسلئے کھڑی کی گئی کیونکہ میں نے ایک شادی کا رشتہ قبول کرنے سے انکار کر دیا تھا۔
میرے بارے میں عجیب و غریب افواہیں پھیلائی جاتی رہی ہیں جس میں یہ دعوی بھی شامل ہے کہ میں خاموشی سے شادی کرچکی ہوں اور شوبز چھوڑ دیا ہے۔
اگر میں کسی ڈرامے میں کچھ عرصہ نظر نہ آں تو لوگ خود بخود افواہیں گھڑ لیتے ہیں اور میری زندگی کے بارے میں غلط بیانیوں کا سلسلہ شروع ہوجاتا ہے۔
