وفاقی وزیر صحت مصطفی کمال نے کہا ہے کہ 27ویں ترمیم کے موقع پر بارگیننگ نہیں کی، ایم کیو ایم کی بلدیاتی آئینی ترمیم جلد منظور ہوگی، آئینی ترمیم میں ایم کیو ایم کا موقف شامل کرنے پر حکومت کے شکر گزار ہیں۔
کراچی میں پریس کانفرنس کرتے ہوئے مصطفی کمال نے کہا کہ ایم کیو ایم کی جانب سے آئینی ترمیم کا بل اسمبلی میں پیش کیا گیا تھا، 26ویں آئینی ترمیم کے وقت ہمارے بل کو کمیٹی کو بھیجا گیا تھا، وفاقی حکومت نے ہم سے اپیل کی تھی کہ ابھی اس معاملے کو روک دیں، ایم کیو ایم چاہتی تو زیادہ وزارتیں اور مراعاتیں مانگتی مگر 27ویں ترمیم کے موقع پر ہم نے بارگیننگ نہیں کی، آنے والے مہینوں میں ایم کیو ایم کی بلدیاتی نظام سے متعلق ترمیم آئیگی اور اسمبلی میں منظور بھی ہوگی، میں پاکستان اور پاکستانیوں کو مبارکباد دینا چاہتا ہوں۔
انہوں نے کہا کہ ایم کیو ایم نے عوامی مسائل کا حل نکالا اور ہر سیاسی جماعت کے پاس گئے، حکومت میں جانے کیلئے ایک نکاتی بلدیاتی آئینی ترمیم بل کو سپورٹ کرنے کی شرط رکھی، مسلم لیگ(ن) نے ہم سے اس پر ہم سے معاہدہ کیا، مختلف سیاسی جماعتوں کے شکر گزار ہیں انہوں نے ہمارا ساتھ دیا۔
انہوں نے کہا کہ پیپلز پارٹی 27ویں ترمیم میں ہمارے بل کو قبول کرنے کو تیار نہیں تھی، ہم سے وفاقی حکومت نے اپیل کی کہ اس مرتبہ اہم قانون سازی کی ضرورت ہے، وزیراعظم، کابینہ، مسلم لیگ (ن)، پی ٹی آئی اور چوہدری سالک سمیت سب کا شکر گزار ہوں، انہوں نے ایم کیو ایم کی آئینی ترمیم کو 27ویں آئینی ترمیم میں شامل کرنے کی حمایت کی۔
انہوں نے بتایا کہ سٹینڈنگ کمیٹی میں 6 گھنٹے اس پر بحث ہوئی، حکومت نے کہا کہ اس ترمیم میں فوج اور عدلیہ کے حوالے سے ترامیم شامل ہیں، پنجاب نے جو بل پاس کیا ہے وہ من و عن ہمارا بل ہی ہے، یہ ہمارے ہی موقف کی 100فیصد تائید ہے اور مہر ہے۔
انہوں نے کہا کہ جب لوگ مظاہرے کر رہے تھے ہم نے پاکستان کے لوگوں کا مقدمہ ایوان میں پہنچایا، 70سالوں سے ہم اپنی فوج کو اپنے لوگوں کے خلاف ہی لڑوا رہے ہیں، یہ پاکستان کی نیشنل سیکیورٹی کا مسئلہ ہے، وفاق کو بلوچستان کے لوگوں کی محرومیوں کو دور کرنے کی ضرورت ہے۔
