فیلڈ مارشل سید عاصم منیر نے کہا ہے کہ جنگ مسلط کرنیوالوں کو اسی طرح جواب دیا جائیگا جیسا مئی میں دیا گیا تھا، انہوں نے کہا کہ پاکستان امن پسند ملک ہے، پاکستان کی فوج اللہ کی فوج ہے اور ہمارے سپاہی اللہ کے نام پر لڑتے ہیں، بھارت کیخلاف جنگ میں اللہ نے پاکستان کو سر بلند کیا ہے۔
ایوانِ صدر میں اردن کے شاہ عبداللہ دوم کے اعزاز میں ظہرانے اور انہیں نشانِ امتیاز عطا کرنے کی تقریب میں میڈیا سے گفتگو کرتے ہوئے فیلڈ مارشل سید عاصم منیر نے کہا کہ مسلمان جب اللہ پر بھروسہ کرتا ہے تو اللہ دشمن پر اس کی پھینکی ہوئی مٹی کو بھی میزائل بنا دیتا ہے، انہوں نے کہا کہ اللہ کے حکم اور اسکے فرمان کے مطابق اپنے فرائض کی انجام دہی کرتا ہوں، اللہ کا خاص کرم ہے کہ پاکستان نے اپنے دشمن کو دھول چٹائی ہے۔
