پاکستان کرکٹ بورڈ (پی سی بی) نے پاکستان سپر لیگ کی فرنچائز ٹیموں اور دیگر اثاثوں کی ویلیو ایشن کا عمل مکمل کر لیا ہے اور فرنچائزز کو 10 سالہ نئے معاہدوں کی پیشکش بھی کردی ہے جس کیلئے نئی فیس کیساتھ فرنچائز معاہدوں کی تجدید کی پیشکش تمام اہل پی ایس ایل فرنچائزز کو بھیج دی گئی ہے اور ان سے کہا گیا ہے کہ وہ مقررہ وقت میں پی ایس ایل مینجمنٹ کو اپنے اپنے فیصلے سے آگاہ کریں جبکہ پی سی بی کو چارٹرڈ فرم ای وائی مینا کی جانب سے 2 نئی پی ایس ایل فرنچائز ٹیموں کی ممکنہ پرائس کے بارے میں رپورٹس بھی موصول ہو گئی ہیں۔
ذرائع کے مطابق 10 سالہ معاہدوں کی شفافیت کو یقینی بنانے کیلئے کرکٹ بورڈ نے فرنچائز کے نمائندوں اور جارٹرڈ فرم ای وائے مینا (EY MENA) کے مابین مشترکہ اور انفرادی طور پر ملاقاتوں کا انتظام بھی کیا ہے، ملاقاتوں میں فرنچائزز مالکان کو موقع دیا جائیگا کہ وہ ویلیو ایشن کے طریقہ کار کا جائزہ لیں اور اس حوالے سے جو بھی سوالات ہیں وہ کریں، مزید برآںپی سی بی کو 2 نئی پی ایس ایل فرنچائز ٹیموں کی ممکنہ پرائس کے بارے میں رپورٹس موصول ہونے کے بعد جلد دونوں ٹیموں کی فروخت کیلئے ٹینڈر کا عمل جلد شروع کر دیا جائیگا۔
نئی فرنچائز خرید نے میں دلچسپی رکھنے والوں کیلئے ممکنہ نئی ٹیموں میں حیدرآباد، سیالکوٹ، مظفرآباد، فیصل آباد، گلگت اور راولپنڈی شہر شامل ہیں۔
پی سی بی انتظامیہ کے مطابق پی ایس ایل کے تمام شراکت داروں کیساتھ منصفانہ، شفاف اور باہمی مفاد پر مبنی تعلقات برقرار رکھے جائینگے۔
