پاکستان ریلوے نے لاہور تا راولپنڈی ریل کار کے نئے ریک کا افتتاح کردیا۔
افتتاحی تقریب میں چیف ایگزیکٹو آفیسر ریلوے عامر علی بلوچ نے شرکت کی اور نئی بوگیوں کا معائنہ کیا۔
ریلوے حکام کے مطابق ریل کار کے نئے ریک کو دشوار گزار راستوں پر موجود ٹریک سے گزارنے کیلئے بوگیوں کو ری فربش کیا گیا ہے، بوگیوں میں مسافروں کی سہولت کیلئے کھانے پینے کی اشیا، ابتدائی طبی امداد کیلئے ادویات، اور صفائی ستھرائی کا خاص انتظام کیا گیا ہے۔
اس موقع پر تقریب سے خطاب کرتے ہوئے سی ای او ریلوے عامر علی بلوچ نے کہا کہ مزید ٹرینوں میں بھی سہولیات فراہم کی جارہی ہیں، ریل کا سفر آج بھی دیگر ٹرانسپورٹ ذرائع کے مقابلے میں سستا اور محفوظ ہے، ہمارا اصل مقصد مسافروں کو جلد اور بحفاظت ان کی منزل تک پہنچانا ہے۔
انہوں نے بتایا کہ لوکو موٹو اور ٹریکس کی مرمت کا کام جاری ہے جبکہ مستقبل میں ٹرینوں کی رفتار اور سروس کے معیار میں مزید بہتری لانے کیلئے انٹرنیشنل فنانسنگ کے ذریعے ٹریک کی اپ گریڈیشن بھی کی جا رہی ہے ۔
