نارووال: وفاقی وزیر احسن اقبال نے کہا ہے کہ پاکستان نے ثابت کیا جنگیں تعدادسے نہیں جیتی جاتیں، بھارت کی چیخیں واشنگٹن پہنچی، بھارت امریکا سے کہتا رہا آ اورہماری جان چھڑواو، ہماری مسلح افواج نے بھارت کو ناکوں چنے چبوائے،پاک فضائیہ نے دشمن کواپنی صلاحیت سے شکست فاش کیا۔اپنے آبائی حلقے نارروال میں یوم تشکر کے موقع پر نکالی گئی ریلی سے خطاب کرتے ہوئے احسن اقبال نے کہاکہوفاقی وزیر نے کہا کہ پاکستان نے پہلے دن ہی کہا تھا پہلگام واقعہ سے کوئی لینا دینا نہیں، بھارت نے ڈرامہ رچاکرکوشش کی تھی کہ پاکستان پر غلبہ پاسکے، بھارت نے پاکستان کی بات چیت کی پیش کش ٹھکرا کر فیصلہ میدان جنگ میں کرنے کی کوشش کی، ہم نے بھارت کو میدان جنگ میں دن کو تارے دکھائے اورواپس میز پر لائے۔
احسن اقبال کا کہنا تھا کہ بھارتی میڈیا ایک تھیٹر بنا ہوا تھا، بھارتی میڈیا نے فلموں اور ڈراموں سے زیادہ جھوٹ بولا، حقیقت پتہ چلنے پر بھارت کے پلے خود کچھ نہیں رہا تھا،آج مسئلے جنگ وجدل سے نہیں بات چیت سے ہی حل ہوسکتے ہیں۔
انہوںنے کہا پاکستان نے رافیل طیارے گراکر بھارت کا غرور خاک میں ملایا، پاکستان نے ثابت کیا کہ شاہینوں کا مقابلہ دنیا میں کوئی نہیں کرسکتا، ایل اوسی پر ہماری افواج نے بھارتی چوکیوں کو نشانہ بناکر بھاگنے پر مجبور کردیا۔ انہوں نے کہا کہ بھارتی پائلٹ نے جہاز اڑانے سے انکار کردیا اورڈرونز بھیجنے پر مجبور ہوئے، پاکستانی افواج نے70سیزائد بھارتی ڈرونز گرائے، بھارت نے رات کی تاریکی میں پاکستان پر3میزائل چھوڑے، پاکستان نے جوابی کارروائی میں بھارت کے ہوائی اڈوں،فوجی تنصیبات کو نشانہ بنایا۔
احسن اقبال نے کہا کہ پاکستان نے ثابت کردیا کہ جنگیں تعدادسے نہیں جیتی جاتیں، آج پوری دنیا پاکستان کی حکمت عملی اورصلاحیت کی تعریف کررہی ہے، بانی پی ٹی آئی نے بھی اسمبلی میں کھڑے ہوکرکہا تھا کیا کروں بھارت پر حملہ کردوں۔
ان کا کہنا تھا کہ عمران خان کو جنگ لڑنے کی حکمت عملی کا علم نہیں تھا، آج وزیراعظم شہبازشریف نے مسلح افواج کو پورا جواب دیا، سی این این نے بتایا کہ بھارت نے جان بخشی کرانے کیلئے امریکا کی منتیں کیں، امریکا کی مداخلت پر سیز فائر ہوا، پاکستان نے اپنے ذمہ دار ملک ہونے کا ثبوت دیا ہے۔
