نیو یارک: پاکستان نے کہا ہے کہ پانی زندگی ،جنگوں میں استعمال ہونے والا ہتھیار نہیں، مسئلہ کشمیر حل نہ ہونے تک خطے میں قیام امن ممکن نہیں، پہلگام واقعے سے کوئی تعلق نہیں، شفاف تحقیقات میں تعاون کریں گے۔ اقوام متحدہ میں پاکستان کے مستقل مندوب عاصم افتخار نے پریس کانفرنس کرتے ہوئے کہا کہ کشمیر پاکستان اور بھارت کے درمیان بنیادی مسئلہ ہے، حل نہ ہونے تک خطے میں قیام امن ممکن نہیں۔
انہوں نے کہا کہ بھارت کے حالیہ اقدامات پر شدید تحفظات ہیں، پاکستان کی درخواست پر اجلاس بلانے پر سلامتی کونسل کے مشکور ہیں۔ انہوں نے کہا کہ دنیا جان لے پاکستان کا پہلگام واقعہ سے کوئی تعلق نہیں، دنیا اس کی صاف شفاف تحقیقات کرے مکمل تعاون کریں گے۔ انہں نے کہا کہ پاکستان اپنی سالمیت اور دفاع کیلئے مکمل تیار ہے، بھارت نے یکطرفہ طور پر ورلڈ بینک کے توسط سے طے پانیوالے سندھ طاس معاہدے کو ختم کیا۔
انہوں نے کہا کہ پانی زندگی ہے، جنگوں میں استعمال ہونے والا ہتھیار نہیں، ماضی میں لڑی جانے والی جنگوں کے دوران بھی دریاؤں کا پانی نہیں روکا گیا۔انہوں نے کہا ہے کہ 24کروڑ پاکستانیوں کا انحصار ان دریاؤں پر ہے، اگر پانی روکا گیا تو نتائج کا ذمہ دار بھارت ہو گا۔
