اسلام آباد: پاکستان نے ملکی وغیر ملکی میڈیا کو ایل او سی کے دورے کے دوران زمینی حقائق پیش کر کے بھارتی پروپیگنڈے کا پھول کھول دیا جبکہ وزیر اطلاعات عطاء تارڑ نے کہا ہے کہ بھارت جن مقامات کو خیالی دہشت گرد کیمپس قرار دیتا رہا ہے، وہ عام شہری آبادی کے علاقے ہیں، پھرواضح کرتے ہیں پاکستان علاقائی امن کیلئے پرعزم ہے تاہم کسی بھی بھارتی جارحیت کا فوری اور منہ توڑ جواب دیں گے، بھارت الزام تراشی سے قبل اپنے زیر قبضہ کشمیر میں انسانی حقوق کی خلاف ورزیوں کا نوٹس لے۔
پیر کو وفاقی وزیر اطلاعات عطا اللہ تارڑ نے ملکی وغیر ملکی میڈیا کے ہمراہ لائن آف کنٹرول کا دورہ کیا اور بھارتی پروپیگنڈے کو بے نقاب کرنے کیلئے زمینی حقائق پیش کئے ۔میڈیا نمائندوں کو ان مخصوص مقامات پر لے جایا گیا جنہیں بھارت کی جانب سے مبینہ دہشت گردی کے ٹھکانے قرار دیا گیا تھا۔
زمینی حقائق، مقامی آبادی کی گواہی و حالات کا خود مشاہدہ کر کے میڈیا نے بھارتی دعوئوں کی حقیقت جاننے کا موقع حاصل کیا۔اس موقع پر گفتگو کرتے ہوئے وفاقی وزیر عطاء تارڑ نے کہا کہ ملکی وغیر ملکی صحافیوں کو ایل او سی کا دورہ کرانے کا مقصد بھارت کی جانب سے پھیلائے گئے جھوٹے اور بے بنیاد پروپیگنڈے کو بے نقاب کرنا تھا۔انہوں نے کہا کہ بھارت کی جانب سے بارہا پاکستان کیخلاف بے بنیاد الزامات لگائے گئے لیکن آج ہم نے تمام حقائق سامنے رکھ دیئے ہیں جو مقامات بھارت خیالی دہشت گرد کیمپس قرار دیتا رہا ہے وہ دراصل عام شہری آبادی کے علاقے ہیں۔
انہوں نے کہا کہ پاکستان ایک ذمہ دار ریاست ہے جو نہ صرف علاقائی بلکہ عالمی امن کیلئے بھی پرعزم ہے ۔ انہوں نے کہا کہ پاکستان دنیا کے کسی بھی حصے میں دہشت گردی یا دہشت گردانہ سرگرمیوں کی مذمت کرتا ہے۔انہوں نے کہا کہ ہم نے اپنے عمل سے بارہا ثابت کیا ہم امن کے داعی ہیں مگر اپنی خود مختاری کے دفاع کیلئے ہم ہر حد تک جائیں گے۔
انہوں نے مطالبہ کیا کہ بھارت کو الزام تراشی سے پہلے اپنے زیر قبضہ کشمیر میں انسانی حقوق کی خلاف ورزیوں کا نوٹس لینا چاہئے۔ انہوں نے کہا کہ بھارت اپنی داخلی ناکامیوں کو چھپانے کیلئے لائن آف کنٹرول پر پروپیگنڈا کرتا ہے مگر آج عالمی میڈیا نے اصل خود اپنی آنکھوں سے حقیقت دیکھ لی ہے۔ وفاقی وزیر نے ایک بار پھر واضح کیا کہ پاکستان علاقائی امن کیلئے پرعزم ہے تاہم کسی بھی بھارتی جارحیت کا فوری اور منہ توڑ جواب دیں گے۔
