اسلام آباد: صدر آصف زرداری نے یوم مزدور پر مزدوروں کی خودمختاری، منصفانہ اجرت، محفوظ ماحول و سماجی تحفظ کے عزم کا اعادہ کرتے ہوئے کہا ہے کہ مزدور و محنت کش طبقہ معیشت اور قومی ترقی کا محرک ہے، ہمہ وقت بدلتی جاب مارکیٹ کے چیلنجز کا مقابلہ کرنے کیلئے ہمیں کارکنوں ،نوجوانوں کو جدید مہارتوں سے آراستہ کرنے کی ضرورت ہے۔
یوم مزدور پر جاری بیان میں صدر مملکت نے کہا کہ آج کا دن ہمیں اس تاریخی جدوجہد کی یاد دلاتا ہے جو دنیا بھر کے محنت کشوں نے اپنے حقوق اور وقار کیلئے کی۔انہوں نے کہا کہ مزدور نہ صرف ہمارے بنیادی ڈھانچے کی تعمیر کرتے ہیں بلکہ ہماری صنعتوں،زراعت اور معیشت کی ترقی میں بھی اہم کردار ادا کرتے ہیں، ہمارے یہ کارکن ہماری صنعتوں، زراعت، چھوٹے اور درمیانے درجے کے کاروباری اداروں، حکومت اور دیگر عوامی شعبوں کو چلاتے ہیں۔
انہوں نے کہا کہ ہمارے کارکن ہمارا فخر ہیں اور ہماری قومی ترقی انہی کی محنت اور کردار کی مرہون منت ہے۔ انہوں نے کہا کہ آج کی تیزی سے بدلتی دنیا میں اپنے نوجوانوں اور کارکنوں کے روشن مستقبل کو محفوظ بنانے کیلئے ہمیں انہیں ہنرمند بنانے پر توجہ دینا ہوگی۔
انہوں نے کہا کہ ہمہ وقت بدلتی جاب مارکیٹ کے چیلنجوں کا مقابلہ کرنے کیلئے ہمیں اپنے کارکنوں اور نوجوانوں کو جدید مہارتوں سے آراستہ کرنے کی ضرورت ہے۔ انہوں نے تمام حکومتوں، نجی اداروں، تعلیمی اداروں اور سول سوسائٹی پر زور دیا کہ وہ ہمارے مزدوروں کی ہنرمندی کیلئے ایک جامع نظام تشکیل دینے میں اپنا کردار ادا کریں۔
صدر نے کہا کہ آجر، ٹریڈ یونینز، سول سوسائٹی اور پبلک سیکٹر پر زور دیا کہ وہ منصفانہ لیبر ماحول تشکیل دینے اور مزدوروں کی فلاح و بہبود کیلئے کام کریں۔
