واشنگٹن: وفاقی وزیر برائے خزانہ سینیٹر محمد اورنگزیب نے کہا ہے کہ دنیا بھر کے سرمایہ کاروں، شراکت داروں کو پاکستان کی ترقی، مواقع و ناقابل واپسی تبدیلی کے سفر میں شمولیت کی دعوت دیتے ہوئے کہا کہ پاکستان کی معیشت بحالی اور تبدیلی کی راہ پر گامزن ہوچکی، انسانی ترقی کو مسلسل و جامع ترقی کیلئے بنیاد بنانا ہوگا،مالیاتی نظام کو مزید مضبوط و لچکدار بنانے کے لئے پرعزم ہیں۔
جاری بیان کے مطابق ہارورڈ یونیورسٹی میں منعقدہ پاکستان کانفرنس 2025سے کلیدی خطاب میں وزیر خزانہ محمد اورنگزیب نے کہا کہ پاکستان ایک اہم موڑ پر ہے، جہاں معیشت بحالی اور تبدیلی کی راہ پر گامزن ہو چکی ہے۔
انہوں نے بتایا کہ موجودہ حکومت نے ایک مشکلات سے دوچار معیشت کو سنبھالا، بنیادی ڈھانچے کو مستحکم کیا، اعتماد بحال کیا اور ترقی کا عمل دوبارہ شروع کیا۔وزیر خزانہ نے زور دیا کہ استحکام کوئی منزل نہیں بلکہ ترقی کا ذریعہ ہے۔
انہوں نے حکومتی حکمتِ عملی پر بات کرتے ہوئے مالیاتی نظم و ضبط، مہنگائی پر قابو پانے، توانائی، ٹیکس، حکمرانی اور سرکاری اداروں کی اصلاحات کا خاکہ پیش کیا۔انہوں نے پاکستان میں ترقی کے بڑے مواقع، جیسے معدنی وسائل، آئی ٹی شعبے کی توسیع، گرین انرجی منصوبے اور نوجوان آبادی کے کاروباری جذبے پر بھی روشنی ڈالی۔
انہوں نے کہا کہ انسانی ترقی کو مسلسل اور جامع ترقی کے لئے بنیاد بنانا ہوگا۔وزیر خزانہ نے کہا کہ پاکستان نے قرض کا جی ڈی پی سے تناسب 75فیصد سے کم کر کے 67.2فیصد کر دیا ہے اور درمیانی مدت میں اسے 60فیصد سے بھی نیچے لانے کا ہدف ہے۔
انہوں نے بتایا کہ خسارے میں چلنے والے سرکاری اداروں کی شفاف نجکاری سے جی ڈی پی میں سالانہ 2فیصد بچت متوقع ہے۔ انہوں نے کہا کہ پاکستان مالیاتی نظام کو مزید مضبوط اور لچکدار بنانے کے لئے پرعزم ہے،بنیادی ڈھانچے اور زراعت میں ماحولیاتی مزاحمت شامل کرنے کے عزم کا اعادہ کرتے ہوئے وزیر خزانہ نے آئی ایم ایف کے ریزیلینس اینڈ سسٹین ایبلیٹی فیسلٹی اور ورلڈ بینک کے کنٹری پارٹنرشپ پروگرام کو اہم سنگ میل قرار دیا۔وزیر خزانہ نے دنیا بھر کے سرمایہ کاروں، شراکت داروں اور بہترین دماغوں کو پاکستان کی ترقی، مواقع اور ناقابل واپسی تبدیلی کے سفر میں شامل ہونے کی دعوت دیتے ہوئے کہا کہ مہنگائی میں اضافے کی رفتار میں تاریخی کمی جو اب 0.7فیصد کی سطح پر ہے اور 60برس میں سب سے کم ہے،زرمبادلہ کے ذخائر دوگنا ہو گئے ہیں،روپے کی قیمت میں 3فیصد اضافہ ہوا ہے،مارچ 2025میں کرنٹ اکانٹ سرپلس ایک ارب ڈالر سے زیادہ رہا،غیر ملکی سرمایہ کاری میں 44فیصد اضافہ ہوا،آئی ٹی برآمدات میں 24فیصد اضافہ ہوا۔انہوں نے کہا کہ ترسیلات زر 38ارب ڈالر تک پہنچنے کا امکان ہے،24سال بعد پہلی بار مالیاتی سرپلس حاصل کیا گیا، فچ نے پاکستان کی کریڈٹ ریٹنگ بی مستحکم آٹ لک کے ساتھ اپ گریڈ کی۔
انہوں نے کہا کہ پاکستان کا مستقبل جراتمندانہ اور ضروری فیصلوں سے تشکیل پائے گا، اگر ہم اپنے عوام پر سرمایہ کاری کریں، معیشت کو جدید بنائیں اور اصلاحات کا عمل جاری رکھیں تو پاکستان ایک مضبوط، سرسبز اور زیادہ مقابلہ کرنے والا ملک بن کر ابھرے گا۔
