اسلام آباد: وفاقی وزیر قانون اعظم نذیر تارڑ نے کہاہے کہ پاکستان میں تمام مذہبی برادریوں کو آئین کے تحت تحفظ حاصل ہے ،قومی کمیشن برائے اقلیت بل اقلیتوں کے حقوق کے تحفظ کیلئے متعارف کرایا گیا ہے ۔
جاری بیان کے مطابق وفاقی وزیر قانون اعظم نذیر تارڑ سے پاکستان میں نیدرلینڈ کی سفیر ہینی فوکل ڈی وریز نے ملاقات کی جس میں قانون سازی، پالیسی اصلاحات ،انسانی حقوق کو فروغ دینے اور مختلف شعبوں میں دوطرفہ تعلقات مستحکم کرنے کیلئے باہمی تعاون کی کوششوں پر تبادلہ خیال کیا گیا۔
وفا قی وزیر نے کہا کہ پاکستان میں تمام مذہبی برادریوں کو آئین کے تحت تحفظ حاصل ہے ،قومی کمیشن برائے اقلیت بل اقلیتوں کے حقوق کے تحفظ کیلئے متعارف کرایا گیا ہے۔
نیدر لینڈ کی سفیر نے انسانی حقوق ایجنڈے کو نافذ کرنے میں پاکستانی کوششوں کا اعتراف کیا اور دوطرفہ تعلقات مضبوط بنانے میں کھیلوں کے کردار کو تسلیم کرتے ہوئے متعلقہ سرگرمیوں میں حصہ لینے کی دعوت دی۔ سفیر نے وفاقی وزیر کو اپریل میں ڈچ ہاکی کے لیجنڈ فلوریس جان بوولینڈر کے آئندہ دورے کے بارے میں بتایا اور عالمی سطح پر باہمی مفادات کو آگے بڑھانے کے نیدرلینڈ کے عزم کا بھی اعادہ کیا ۔
