اسلام آباد: وزیراعظم شہبازشریف نے پودا لگا کرشجرکاری مہم 2025ء کا آغازکرتے ہوئے کہا ہے کہ درخت ماحول کو بہتر بنانے میں مدد دیتے ہیں ،آزاد کشمیر، گلگت بلتستان سمیت پورے ملک میں 4کروڑ 17 لاکھ پودے لگائے جائیں گے ،پوری قوم بالخصوص نوجوان اور کسان بڑھ چڑھ کر شجر کاری مہم میں حصہ لیں۔
وزیراعظم نے شجر کاری کے حوالے سے منعقدہ تقریب سے خطاب کرتے ہوئے کہا کہ رحمتوں اور برکتوں والے ماہ مقدس میں 2025ء کی شجرکاری مہم کا آغاز کر دیا گیا ہے اس دوران چاروں صوبوں کے ساتھ ساتھ آزاد کشمیر اور گلگت بلتستان میں تقریبا 4 کروڑ 17لاکھ پودے لگانے کا منصوبہ ہے جس میں پوری قوم اور بالخصوص نوجوان اور کسان بڑھ چڑھ کر حصہ لیں۔
وزیراعظم نے کہاکہ درخت ہمارے ماحول کو بہتر بنانے میں بہت مدد دیتے ہیں،شجرکاری سے بیماریوں اور ماحولیاتی آلودگی میں کمی آئے گی۔انہوں نے کہا کہ پچھلے چند سالوں کے دوران ہونے والی موسمیاتی تبدیلیوں کی وجہ سے شجر کاری کی اہمیت مزید بڑھ گئی ہے کیونکہ دنیامیں موسمیاتی تبدیلیاں رونما ہوئی ہیں۔
انہوں نے کہا کہ 2022کاشدید ترین سیلاب موسمیاتی تبدیلی کی وجہ سے ہی آیا اور اس میں بڑے پیمانے پر تباہی ہوئی،بدقسمتی سے پاکستان موسمیاتی تبدیلی سے سب سے زیادہ متاثرہ 10ممالک میں شامل ہے، حالانکہ گرین ہاؤس گیسزکے اخراج میں پاکستان کا حصہ نہ ہونے کے برابر ہے، اس لئے ضرورت اس بات کی ہے کہ زیادہ سے زیادہ پودے لگائے جائیں۔
انہوں نے کہا کہ ہمیں رمضان المبارک کی برکات سمیٹتے ہوئے ملکی ترقی و خوشحالی کیلئے دن رات محنت کرنی چاہئے ، انشاء ہم پاکستان کو عظیم ملک بنائیں گے۔
