اسلام آباد: وزیراعظم شہباز شریف نے کہا ہے کہ بنیادی انسانی حقوق و مذہبی آزادی کی خلاف ورزیوں ،اسلامو فوبیا کی خطرناک لہر کے خاتمے کیلئے مزید اقدامات کی فوری ضرورت ہے، آزادی اظہار کی آڑ میں توہین مذہب یا مقدس علامتوں کی بے حرمتی کا کوئی جواز نہیں ، عالمی امن و ہم آہنگی کیلئے تمام مذاہب اور قابل احترام شخصیات کا احترام ضروری ہے۔
انسداد اسلامو فوبیا کے عالمی دن پر جاری بیان میں وزیراعظم شہباز شریف نے کہا کہ آج ہم عالمی برادری کیساتھ مل کر اسلامو فوبیا سے نمٹنے کا عالمی دن منا رہے ہیں، تین سال قبل اقوام متحدہ کی جنرل اسمبلی نے اس دن کو منانے کا تاریخی فیصلہ کیا تھا ۔ انہوں نے کہا کہ بڑھتے تعصب، نفرت، امتیازی سلوک و مسلم کمیونٹیز کیساتھ مقدس علامتوں و عبادتگاہوں کیخلاف حملوں کے تناطر میں یہ دن دنیا بھر میں مسلمانوں کو درپیش چیلنجز کی سنگینی کی واضح یاد دہانی ہے۔
انہوں نے کہا کہ یہ دن بھرپور انداز سے متحرک عملدرآمد کی پکار کے طور پر کردار ادا کرنے کے ساتھ ساتھ عالمی برادری کی ٹھوس قانون سازی اور پالیسی اقدامات کے ذریعے اسلامو فوبیا کا مقابلہ کرنے کی اجتماعی خواہش کی عکاسی بھی کرتا ہے۔
انہوں نے کہا کہ پاکستان کو اقوام متحدہ میں اس اہم اقدام کی قیادت پر فخر ہے ،کچھ رکن ممالک کی جانب سے قرآن پاک کی بے حرمتی کو غیر قانونی قرار دینے کیساتھ مسلمانوں کیخلاف تعصب دور کرنے کیلئے کئے گئے اقدامات کا خیرمقدم کرتے ہیں تاہم اسلامو فوبیا کی خطرناک لہر کو ختم کرنے، بنیادی انسانی حقوق و مذہبی آزادیوں کی کھلم کھلا خلاف ورزیوں کو ختم کرنے کیلئے مزید بہت کچھ کرنے کی فوری ضرورت ہے۔انہوں نے کہا کہ ایک ایسے وقت میں جب مذہبی عدم برداشت عروج پر ہے، ہم اس بات پر زور دیتے ہیں کہ آزادی اظہار کی آڑ میں توہین مذہب یا مقدس علامتوں کی بے حرمتی کا کوئی جواز نہیں، ہر مسلمان کیلئے حضور نبی اکرم ۖ کی عزت کی حفاظت صرف ایک فرض ہی نہیں بلکہ مقدس امانت ہے جسے ہم پورے یقین کیساتھ برقرار رکھتے ہیں، عالمی امن اور ہم آہنگی کیلئے تمام مذاہب اور ان کی قابل احترام شخصیات کا احترام ضروری ہے۔
انہوں نے کہا کہ عالمی فورمز ایسی کارروائیوں سے ہونیوالے گہرے نقصان کو پہچانیں اور روک تھام کیلئے اجتماعی طور پر کام کریں۔انہوں نے کہا کہ پاکستان عالمی برادری، انسانی حقوق تنظیموں ،عالمی رہنماؤں سے عفریت کیخلاف بیداری پیدا کرنے کیساتھ قرآن پاک کی بے حرمتی، مساجد پر حملوں اور مسلمانوں کیخلاف مذہبی عدم برداشت کے دیگر واقعات کو روکنے کیلئے اپنے مطالبے کا اعادہ کرتا ہے۔
انہوں نے کہا کہ اقوام متحدہ کی جنرل اسمبلی کے فیصلے کے مطابق ہم اسلاموفوبیا سے نمٹنے کیلئے اہم سنگ میل کے طور پر خصوصی ایلچی کے جلد تقررکے منتظر ہیں۔انہوں نے کہا کہ آئیے اس دن کو اسلامو فوبیا اور مسلم مخالف نفرت کی بڑھتی لہر کیخلاف بات ،کرنے، مذاہب، عقائد، ثقافتوں اور تہذیبوں میں مکالمے، ہم آہنگی، باہمی افہام و تفہیم کو فروغ دینے اور عالمی اتحادو یکجہتی کیلئے استعمال کریں، یہ اقدامات باہمی تقسیم پر قابو پانے اور متنوع برادریوں میں باہمی احترام کی تعمیر کیلئے ضروری ہیں۔
