اسلام آباد: صدر آصف زرداری نے کہا ہے کہ خواتین کو بااختیار ، تعلیم ، معیشت ، قیادت میں آگے لانا قومی مفاد میں ہے، پاکستان آئینی دفعات ، عالمی معاہدوں کے مطابق خواتین کے حقوق کے فروغ کیلئے پرعزم ہے، ہمیں ہمہ جہت و مساوات پر مبنی معاشرہ تشکیل دینا ہوگا۔ عالمی یوم نسواں پر جاری بیان میں صدر زرداری نے کہا کہ آج ہم خواتین کی استقامت ، معاشرتی تشکیل و ترقی میں کردار کے اعتراف کیلئے عالمی یوم نسواں منارہے ہیں، رواں سال عالمی یوم نسواں کا عنوان ہر خاتون کے حقوق ،مواقع تک مساوی رسائی یقینی بنانے کی اہمیت پر زور دیتا ہے۔
انہوںنے کہا کہ خواتین ہماری آبادی کا تقریبا نصف حصہ ہیں، انہیں بااختیار بنانا ہماری قومی ترقی کیلئے ناگزیر ہے، خواتین کو مساوی حقوق ، مواقع دینے والے معاشرے زیادہ خوشحال، پرامن اور پائیدار ہوتے ہیں۔ انہوں نے کہا کہ خواتین کو تعلیم، معاشی مواقع اور قائدانہ کردار تک رسائی دینا پوری قوم کیلئے سودمند ہے، بہت سی خواتین کو اب بھی تشدد، امتیازی سلوک اور ان کی بھرپور معاشرتی شمولیت میں رکاوٹوں کا سامنا ہے، ہمیں ایک ہمہ جہت اور مساوات پر مبنی معاشرہ تشکیل دینا ہوگا۔
انہوں نے کہا کہ خواتین کے تحفظ، تعلیم اور معاشی آزادی کیلئے پالیسیاں بہتر بنانے کیلئے مزید اقدامات کرنے کی ضرورت ہے۔ انہوں نے کہا کہ کاروباری و نجی شعبے کو خواتین کیلئے مساوی مواقع، منصفانہ اجرت اور کام کیلئے محفوظ ماحول فراہم کرنا چاہئے۔
صدر نے کہا کہ پاکستان آئینی دفعات ، بین الاقوامی معاہدوں کے مطابق خواتین کے حقوق کے فروغ کیلئے پرعزم ہے، گزشتہ کچھ سالوں میں ہم نے گھریلو تشدد، کام کی جگہ پر ہراسانی اور صنفی امتیاز کیخلاف قوانین کے نفاذ سمیت کلیدی اقدامات کئے ، صنفی بنیاد پر تشدد سے بچ جانے والوں کیلئے خصوصی عدالتوں اور ہیلپ لائنز کے قیام سے خواتین کے تحفظ میں مدد ملی ہے۔
انہوں نے کہا کہ پاکستان نے سیاست، عدلیہ، قانون نافذ کرنیوالے اور دیگر سرکاری اداروں میں خواتین کی نمائندگی بڑھانے کیلئے اقدامات کئے ہیں۔ انہوں نے کہا کہ آئیے رواں عالمی یوم نسواں پر ہر خاتون کو بااختیار بنانے کے عزم کا اعادہ کریں ۔
