راولپنڈی: آرمی چیف جنرل سید عاصم منیر سرکاری دورے پر برطانیہ میں موجود ہیں جہاں وہ رائل ملٹری اکیڈمی سینڈہرسٹ میں منعقدہ ساتویں علاقائی استحکام کانفرنس میں شرکت کریں گے۔آئی ایس پی آر کے مطابق آرمی چیف ‘ابھرتا عالمی نظام اور پاکستان کا مستقبل ‘کے عنوان پر کلیدی خطاب کریں گے۔
بیان کے مطابق یہ کانفرنس پاکستان اور برطانیہ کے درمیان دوطرفہ تعاون بڑھانے کیلئے ہر سال منعقد ہوتی ہے، جس میں سول و عسکری پالیسی سازوں کے علاوہ نامور تھنک ٹینکس کے ممبران بھی شریک ہوتے ہیں،بدلتے جغرافیائی و سیاسی حالات کے پیش نظررواں سال کی کانفرنس دو طرفہ تعاون کو فروغ دینے ،باہمی نقطہ نظر کے تبادلے کیلئے غیرمعمولی اہمیت کی حامل ہے۔
قبل ازیں دورے کے پہلے دن آرمی چیف سید عاصم منیر کو شاہی ہارس گارڈز پریڈ گرائونڈ میں شاندار استقبالیہ دیا گیا، جہاں انہیں گارڈ آف آنر پیش کیا گیا، چاق و چوبند دستے نے آرمی چیف کو شاندار انداز میں سلامی پیش کی۔
بیان کے مطابق آرمی چیف کی مصروفیات میں برطانوی چیف آف ڈیفنس سٹاف ایڈمرل ٹونی ریڈیکن، برطانوی آرمی کے چیف آف جنرل سٹاف جنرل سر رولینڈ واکر اور برطانیہ کے نیشنل سکیورٹی ایڈوائزر جوناتھن نکولس پاول سے ملاقاتیں شامل ہیں۔
آرمی چیف برطانوی ہوم سیکرٹری یویٹ کوپر سے بھی ملاقات کریں گے، ملاقاتوں میں باہمی چیلنجز پر تبادلہ خیال اور قریبی تعاون کی ضرورت کو اجاگر کیا جا سکے۔دورے کے دوران آرمی چیف برطانوی فوج کی اہم یونٹس، بشمول لینڈ وارفیئر سینٹر اور 1اسٹرائیک بریگیڈ کا بھی دورہ کریں گے، جہاں انہیں برطانوی فوج کی جدید کاری کی کوششوں اور آپریشنل حکمت عملیوں پر بریفنگ دی جائے گی۔
آئی ایس پی آر کے مطابق پاکستان اور برطانیہ کے تعلقات دیرینہ تاریخی بنیادوں پر قائم ہیں جو سفارتی، اقتصادی اور سکیورٹی شعبوں میں مستحکم روابط رکھتے ہیں، دونوں ممالک کی افواج کے درمیان خاص طور پر انسداد دہشت گردی اور پیشہ ورانہ تربیت کے میدان میں قریبی تعاون جاری ہے۔بیان کے مطابق یہ دورہ پاک برطانیہ پائیدار شراکت داری کی تصدیق ،دونوں ممالک کے مشترکہ عزم کو اجاگر اور علاقائی و عالمی امن کیلئے دونوں ممالک کے مشترکہ عزم کی توثیق کرتا ہے۔
