گورنر سندھ کامران ٹیسوری نے پاکستان انفرا اسٹرکچر ڈویلپمنٹ کمپنی لمیٹڈ کے ترقیاتی منصوبوں میں تاخیر پر برہمی کا اظہار کرتے ہوئے مکمل و زیر تعمیر منصوبوں کی تفصیلی رپورٹ طلب کرلی جبکہ حائل رکاوٹیں فوری دور کر کے کام مکمل کرنے کی ہدایت کردی۔
ذرائع کے مطابق جمعرات کو گورنر سندھ کی زیر صدارت پاکستان انفرا اسٹرکچر ڈویلپمنٹ کمپنی لمیٹڈ کا اجلاس ہوا، جس میں جنرل منیجر انجینئرنگ اور دیگر افسران نے جاری منصوبوں پر بریفنگ دی۔
بریفنگ میں بتایا گیا کہ گرین لائن منصوبہ مختلف حائل رکاوٹوں کے باعث مکمل نہیں ہو پا رہا ،منصوبے کی توسیع کے کام کی بندش سے روزانہ 2کروڑ روپے کا نقصان ہورہا ہے۔
گورنر سندھ نے ترقیاتی منصوبوں کی تکمیل میں تاخیر پر برہمی کا اظہار کرتے ہوئے مکمل و زیر تعمیر منصوبوں کی تفصیلی رپورٹ طلب کرلی۔ کامران ٹیسوری نے منصوبوں کی تکمیل میں حائل وجوہات اور رکاوٹیں فوری دور کرنے کی ہدایت کی۔
انہوں نے کہا کہ عوامی مفاد میں جاری تمام ترقیاتی منصوبے مقررہ وقت پر مکمل کیے جائیں، منصوبوں میں کسی قسم کی کوتاہی یا غفلت برداشت نہیں کی جائے گی۔
انہوں نے پی آئی ڈی سی ایل حکام کو ہدایت کی کہ منصوبوں میں شفافیت، معیار اور رفتار کو یقینی بنایا جائے ۔
