لاہور: وزیراعلی پنجاب مریم نوازنے امریکی سرمایہ کاروں کو پنجاب میں سرمایہ کاری کی دعوت دیتے ہوئے کہاہے کہ پنجاب ثقافتی تنوع سے مالا مال ہے، صوبہ عالمی سطح پر ٹورازم کے حب بننے کا بھرپور پوٹینشل رکھتا ہے۔
بدھ کو وزیراعلی پنجاب مریم نواز سے امریکی قونصل جنرل سٹیٹسن سینڈرس نے ملاقات کی ہے جس میں صوبے میں سرمایہ کاری سمیت دیگر امور پر تبادلہ خیال کیا گیا۔
وزیراعلی نے پاک امریکہ بڑھتے تعلقات کو سراہتے ہوئے کہا کہ دو طرفہ تعلقات میں بہتری خوش آئند ہے، دونوں ممالک کے موجودہ تعلقات افق کی نئی بلندیوں کو چھو رہے ہیں، وزیراعظم شہباز شریف کا حالیہ دورہ امریکہ باہمی تعلقات میں مزید استحکام کا باعث ہو گا۔
انہوں نے بتایا کہ پنجاب نے رواں سال تاریخ کے بدترین سیلا ب کا سامنا پامردی سے کیا ہے، تاریخی ریسکیو اینڈ ریلیف آپریشن کے بعد بحالی کا کام شروع ہو چکا ہے، سیلاب متاثرین کیلئے تاریخی پیکیج کا اعلان کیاگیا ہے۔
انہوں نے بتایاکہ پنجاب میں کلچرل ٹورازم کے فروغ کیلئے قدیمی ثقافتی ورثے کی بحالی اور بہتری کی جارہی ہے۔
وزیراعلی نے امریکی سرمایہ کاروں کوپنجاب میں شاندار مواقع سے فائدہ اٹھانے کی دعوت دیتے ہوئے کہا کہ پنجاب ثقافتی تنوع سے مالا مال سرزمین ہے،صوبہ عالمی سطح پر ٹورازم کے حب بننے کا بھرپور پوٹینشل رکھتا ہے۔
انہوں نے کہا کہ حکومت پنجاب کے ویمن امپاورمنٹ منصوبے ثمر آور ہورہے ہیں، لاہور سمیت دیگر شہروں میں بروقت اقدامات اور ماحول دوست منصوبوں کی وجہ سے ائیر کوالٹی انڈیکس میں بہتری آرہی ہے، سرحد پار سے درآنے والی سموگ کے اثرات کو کم ازکم سطح پر لانے کیلئے کوششیں جاری ہیں۔
اس موقع پر امریکی قونصل جنرل نے کہا کہ پنجاب میں تیز رفتاری سے ہونیوالے کام کو محسوس کیا جارہا ہے، وزیراعلی کا سرمایہ کاری اور تجارت کے فروغ کیلئے ای بزنس منصوبہ قابل تحسین ہے جس سے سرمایہ کاروں کیلئے آسانی پیدا ہورہی ہے۔
