]اسلام آباد: وزیراعشم شہباز شریف نے کہا ہے کہ پاکستان اور ترکیہ کے تعلقات جغرافیہ و وقت سے بالاتر ، مشترکہ عقیدے، تاریخ اور بھائی چارے کی بنیاد پر استوار ہیں۔
ترکیہ کے 102 ویں یوم جمہوریہ پر جاری بیان میں وزیراعظم نے کہا کہ اس پرمسرت موقع پر اپنے پیارے بھائی صدر رجب طیب اردوان اور ترکیہ کے برادر عوام کو اپنی اور پاکستانی عوام کی طرف سے مبارکباد پیش کرتا ہوں۔
انہوں نے کہا کہ ہمیں اپنے ترک بھائیوں کے کارناموں پر فخر ہے اور ترقی کے اس سفر میں ہم ان کے ثابت قدم ساتھی ہیں۔
انہوں نے کہا کہ پاکستان اور ترکیہ عقیدے، تاریخ اور بھائی چارے کے بندھن سے جڑے ہوئے ہیں جو جغرافیہ اور وقت سے بالاتر ہیں۔
انہوں نے کہا کہ ہمارے تعلقات صدر ایردوان کی مدبرانہ رہنمائی میں سٹریٹجک شراکت داری کے نئے دور میں داخل ہوگئے ہیں، کیونکہ ہم مشترکہ مفاد کے تمام شعبوں میں اپنے وقت کی آزمائش اور پائیدار تعلقات کی وسیع صلاحیت کو بڑھانے کیلئے مل کر کوشش کر رہے ہیں۔
