وزیراعلی پنجاب مریم نواز نے کہا ہے کہ مشترکہ حکمت عملی اور فوری ردعمل ہی آفات سے بچاؤ کا راستہ ہے، تمام اداروں کو قدرتی آفات سے نمٹنے کیلئے ہمہ دم تیار رہنا چاہئے۔
قدرتی آفات سے آگاہی اور بچاؤ کے عالمی دن پر جاری بیان میں مریم نواز نے کہا کہ رواں سال پنجاب نے تاریخ کے سب سے بڑے سیلاب کا سامنا کیا، اس دوران سب سے بڑا ریسکیو، ریلیف اور انخلاء آپریشن کیا گیا، پنجاب میں سیلاب کی آمد سے قبل بروقت تیاری نہ ہوتی تو بہت بڑے جانی نقصان کا اندیشہ تھا۔
انہوں نے کہا کہ پنجاب کو لاکھوں انسانی جانوں کے ساتھ ساتھ لاکھوں مویشیوں کو بھی بچانے کا اعزاز حاصل ہے، پنجاب میں بروقت اقدامات اور میڈیکل کیمپ قائم کرنے سے متعددی بیماریوں سے بچاؤ ممکن ہوا۔
انہوں نے کہا کہ قدرتی آفات کو روکا تو نہیں جاسکتا البتہ ٹیکنالوجی، اشتراک کار، پیشگی تیاری سے انسانی جان ومال اور ماحول کوتباہ کن نقصان سے بچایا جا سکتا ہے۔
انہوں نے کہا کہ زندگی کی بقاء کیلئے قدرتی آفات سے نمٹنے کیلئے تمام اداروں کو ہر وقت تیار رہنا چاہئے۔
انہوں نے کہا کہ عوام کو سیلاب، زلزلے اور دیگر قدرتی آفات سے بچانے کیلئے تمام حکومتی ادارے سرگرم عمل و متحرک ہیں۔
