اسلام آباد: ایران نے پاکستان میں سیلاب سے ہونیوالی تباہی اور قیمتی انسانی جانوں کے ضیاع پر افسوس کا اظہار کرتے ہوئے مدد کی پیشکش کی ہے۔
ذرائع کے مطابق ایرانی وزیر داخلہ سکندر مومنی نے پاکستانی ہم منصب محسن نقوی سے ٹیلیفونک رابطہ کیااور سیلاب سے ہونیوالی تباہ کاریوں پر اظہار افسوس کرتے ہوئے مدد کی پیش کش کی۔
ایرانی وزیر داخلہ نے جاں بحق افراد کے خاندانوں سے دلی ہمدردی کا اظہار کرتے ہوئے صبر جمیل کی دعا ء کرتے ہوئے کہا کہ پاکستان ہمارا برادر ہمسایہ ملک ہے، آزمائش کی اس گھڑی میں ہر طرح کی مدد کیلئے تیار ہیں۔ پاکستان میں سیلاب کی تباہ کاریاں دیکھ کر بہت افسوس ہوا ہے، جس میں سینکڑوں افراد اپنے پیاروں سے بچھڑ گئے ہیں۔ ہم پاکستان کے عوام کے ساتھ شانہ بشانہ کھڑے ہیں۔
وزیر داخلہ محسن نقوی نے سیلاب زدگان کیلئے مدد کی پیشکش اور اظہار یکجہتی پر ایرانی ہم منصب کا شکریہ ادا کیا۔ انہوں نے کہا کہ ایران اور پاکستان کی خوشیاں اور غم سانجھے ہیں، موسمیاتی تبدیلیاں پاکستان میں ہولناک تباہی کا پیش خیمہ بن رہی ہیں، تاریخ میں پہلی بار پاکستان اس خطرناک موسمیاتی صورتحال سے گزر رہا ہے۔
انہوں نے کہا کہ تمام ادارے سیلاب متاثرین کی مدد کیلئے فیلڈ میں ہیں اور متاثرین کی بحالی و ریلیف اولین ترجیح ہے۔
