اسلام آباد: وزیراعظم شہباز شریف نے دہشت گردی کیخلاف جنگ میں قومی اتحاد و یگانگت کو ملک میں امن ،سلامتی ،ترقی وخوشحالی کی ضمانت قرار دیتے ہوئے کہا ہے کہ پاکستان نے دہشت گردی کیخلاف عالمی جنگ میں ہراول دستے کا کردار ادا کیا، ناسور کیخلاف دی گئی قربانیوں کو ہمیشہ یاد رکھا جائے گا۔
دہشت گردی کے شکار اور متاثرین کو خراج تحسین پیش کرنے کے عالمی دن پر جاری بیان میں وزیراعظم نے کہا کہ پاکستان آج دنیا کے ساتھ ہم آواز ہو کر دہشت گردی کے شکار اور اس کے متاثرین سے اظہار یکجہتی کرتا ہے، دہشت گردی کے متاثرین سے اظہار یکجہتی پاکستان کے پر خلوص قومی جذبات کی عکاس ہے۔
انہوں نے کہا کہ پاکستان دنیا کا وہ واحد ملک ہے جس کے ہر عمر کے شہری، مسلح افواج، قانون نافذ کرنے والے اداروں نے صف اول میں رہتے ہوئے اس برائی کے خلاف جنگ کی ہے۔ انہوں نے کہا کہ دہشت گرد اور دہشت گردی کے واقعات پاکستان کی قومی غیرت و حمیت اور ہمارے امن و خوشحالی کے عزم کو اللہ کے فضل و کرم سے پسپا نہیں کر سکے۔
وزیراعظم نے کہا کہ پاکستان نے دہشت گردی کے خلاف عالمی جنگ میں ہراول دستے کا کردار ادا کرتے ہوئے نہ صرف 90ہزار قیمتی جانوں کا نذرانہ پیش کیا بلکہ ہماری ملکی معیشت کو بھی خاطر خواہ نقصان کا اٹھانا پڑا۔ ملک کے طول و عرض میں ہر شہر ہر بستی میں کوئی نہ کوئی شاہراہ، بازار اور اسکول دہشت گردی کے واقعات اور متاثرین کی روداد سناتی ہیں۔
انہوں نے کہا کہ جہاں دہشت گردی کا شکار پاکستانی معاشرہ اپنی قربانیوں اور مصائب پر افسردہ ہے، وہیں اپنی بہادری اور شجاعت کی داستانوں پر فخر سے سر بلند بھی ہے۔ انہوں نے کہا کہ پاکستان کی نوجوان نسل اس عزم کے ساتھ پروان چڑھ رہی ہے کہ ملکی سلامتی اور قومی اقدار کی حفاظت ہر شہری کا اہم قومی فریضہ ہے۔
وزیراعظم نے کہا کہ حکومت پاکستان، صوبائی حکومتیں، تمام شہری، قانون نافذ کرنے والے اور انٹلیجنس اداروں، پولیس اور مسلح افواج کے ساتھ کمر بستہ ہو کر اس برائی کو جڑ سے ختم کرنے کیلئے کوشاں ہیں۔ انہوں نے کہا کہ پاکستان نے کامیابی سے آپریشن ضرب عضب، آپریشن رد الفساد اور بے شمار انٹلیجنس بیسڈ آپریشنز کے ذریعے دہشت گردوں کے عزائم کو شکست فاش دی ہے۔
انہوں نے کہا کہ آج ہم بحیثیت قوم جہاں دہشت گردی کے شکار متاثرین اور شہدا کو سلام پیش کرتے ہیں، وہیں دہشت گردی سے نبرد آزما اداروں کو لائق صد تحسین سمجھتے ہیں۔
انہوں نے کہا کہ نیشنل ایکشن پلان دہشت گردی کیخلاف ہماری جامع حکمت عملی کا بہترین عکاس ہے، یہ پلان نہ صرف دہشت گردی کو زمینی مسلح آپریشنز بلکہ، دیگر اقدامات جن میں شدت پسندی کے خلاف نظریاتی، انتظامی، ادارہ جاتی اور بیانیہ کے محاذ پر بھی مربوط حکمت عملی کو بیان کرتا ہے۔
وزیراعظم نے کہا کہ دہشت گردی کیخلاف جنگ میں قومی اتحاد و یگانگت اور یکسوئی پاکستان میں امن وسلامتی، ترقی وخوشحالی اور روشن مستقبل کی ضمانت ہے۔
