بیجنگ (شِنہوا) چین نے ایک رہنما اصول جاری کیا ہے جس کا مقصد چینی کار ساز کمپنیوں کے بیرون ملک مسابقتی طریقہ کار کو منظم کرنا اور کارپوریٹ تعمیل کو مضبوط بنانا ہے۔ اس اقدام کا مقصد ملک کی آٹو صنعت کی عالمی سطح پر صحت مند اور منظم توسیع کو فروغ دینا ہے۔
چین کی وزارت تجارت اور 2 دیگر سرکاری محکموں کی جانب سے جاری کردہ سرکلر کے مطابق 20 نکاتی رہنما اصول بین الاقوامی سطح پر کاروباری سرگرمیوں میں مصروف چینی آٹو کمپنیوں کے لئے عمومی رہنمائی فراہم کرتا ہے جس میں بیرون ملک مارکیٹنگ سمیت مختلف طریقہ کار پر توجہ مرکوز کی گئی ہے۔
اس میں کار ساز کمپنیوں کے لئے بیرون ملک پیداواری تحفظ، معیار کے انتظام، مزدوروں کے تحفظ اور ڈیٹا سکیورٹی جیسے شعبوں میں قوانین و ضوابط کی پابندی سے متعلق رہنمائی بھی فراہم کی گئی ہے۔
بیرون ملک مسابقتی سرگرمیوں کو منظم کرنے کے لئے رہنما اصول میں کار ساز کمپنیوں کو ترغیب دی گئی ہے کہ وہ بین الاقوامی مارکیٹ میں رسد اور طلب کی بنیاد پر لاگت سے متعلق قیمتوں کے تعین کی حکمت عملی اپنائیں اور ناجائز فوائد کے حصول کی خاطر مارکیٹ میں مسابقت کو متاثر کرنے سے گریز کریں۔
رہنما اصول کے مطابق بیرون ملک مارکیٹوں میں گاڑیوں کی تجویز کردہ ریٹیل قیمتیں مقرر کرتے وقت کمپنیوں کو مقامی قوانین و ضوابط، مارکیٹ کے اصولوں اور میزبان ممالک و خطوں کے کاروباری طریقوں کی پابندی کرنی چاہیے۔ مختلف گاڑیوں اور ان کی خصوصیات کے لئے واضح قیمتوں کے درجات مقرر کئے جانے چاہئیں اور قیمتوں میں ایسی بار بار یا نمایاں تبدیلیوں سے گریز کرنا چاہیے جو صارفین کے مفادات کو نقصان پہنچا سکتی ہوں۔
رہنما اصول میں کار ساز کمپنیوں سے یہ بھی کہا گیا ہے کہ وہ مقامی ڈیلروں اور ایجنٹوں کی قیمتوں کے تعین کی خودمختاری کا احترام کریں اور تشہیری سرگرمیاں مقامی قوانین اور روایات کے مطابق انجام دیں۔
وزارت تجارت کے ایک عہدیدار نے کہا کہ اس رہنما اصول میں کار ساز کمپنیوں کی بیرون ملک سرگرمیوں میں قانونی پابندی، منصفانہ مسابقت، باہمی مفاد اور باہمی فائدہ مند تعاون پر زور دیا گیا ہے۔
