راولپنڈی: فیلڈ مارشل سید عاصم منیر نے قوم کو یوم آزادی کی مبارکباد دیتے ہوئے واضح کیا ہے کہ پاک فوج روایتی و غیر روایتی اور ہائبرڈ خطرات سے نمٹنے کیلئے پوری طرح تیار ہے، سرحدوں کی حفاظت کیلئے کسی بھی قربانی سے دریغ، آزادی و خود مختاری پر سمجھوتہ نہیں کریں گے۔
آئی ایس پی آر کی جانب سے جاری بیان کے مطابق پاکستان کے 78ویں یوم آزادی پر فیلڈ مارشل سید عاصم منیر نے کہا کہ وطن عزیز کی خاطر قربانیاں دینے والے بزرگوں اور برصغیر کے مسلمانوں کو خراج تحسین پیش کرتا ہوں۔
انہوں نے کہا کہ پاکستان نہ صرف عالم اسلام کا ایک مضبوط اور ناقابل تسخیر قلعہ ہے بلکہ یہ بین المذاہب ہم آہنگی اور مذہبی آزادی کی روشن مثال بھی ہے جہاں مذہبی اقلیتیں آج بھی ملکی ترقی میں اپنا بھرپور کردار ادا کر رہی ہیں۔ انہوں نے کہا کہ دہشتگردی کے عفریت کو شکست دینے کیلئے پاکستان نے بے پناہ جانی اور مالی قربانیاں دی ہیں۔
انہوں نے پہلگام کے افسوسناک سانحے کا ذکر کرتے ہوئے کہا کہ پاکستان نے نہ صرف اس کی شدید مذمت کی بلکہ شفاف عالمی تحقیقات کی پیشکش بھی کی تاہم بھارتی حکومت نے روایتی ہٹ دھرمی کا مظاہرہ کرتے ہوئے پاکستان کی شہری آبادی کو نشانہ بنایا جس پر قوم کی حمایت سے مسلح افواج نے بھارتی جارحیت کا منہ توڑ جواب دیتے ہوئے آپریشن بنیان مرصوص کیا جو تاریخ میں افواج پاکستان کی بہادری اور ولولہ انگیز جذبے کی علامت بن چکا ہے۔
انہوں نے کہا کہ پاک فوج کی پیشہ ورانہ مہارت اور جنگی تیاری پر مکمل اعتماد ہے، افواج پاکستان روایتی، غیر روایتی اور ہائبرڈ خطرات سے نمٹنے کیلئے پوری طرح لیس ہے، ہم خطے میں امن، ترقی اور خوشحالی چاہتے ہیں لیکن اپنی آزادی اور خودمختاری پر کبھی سمجھوتہ نہیں کریں گے ۔
انہوں نے کہا کہ اور ملکی سالمیت کو نقصان پہنچانے کی کسی بھی مہم جوئی کا بلا جھجک فوری جواب دیا جائے گا، ہم وطن کی سرحدوں کی حفاظت کیلئے کسی بھی قربانی سے دریغ نہیں کریں گے اور اپنی تمام تر توانائیاں پاکستان کے استحکام اور ترقی کیلئے وقف کر دیں گے۔
انہوں نے ایک بار پھر اس عزم کا اظہار کیا کہ پاکستان مقبوضہ جموں و کشمیر کے مظلوم عوام کی جدوجہد کی مکمل حمایت جاری رکھے گا، کشمیریوں کو ان کا حقِ خود ارادیت دلانا ہی مسئلے کا واحد منصفانہ اور پائیدار حل ہے۔فیلڈ مارشل نے کہا ہے کہ پاکستان فلسطین کے مظلوم عوام کے ساتھ کھڑا ہے ،عالمی برادری کو فلسطینیوں کے حقوق کے تحفظ کیلئے فوری اقدامات کرنے چاہئیں۔
آرمی چیف نے جدوجہد آزادی کے تمام شہدا کو سلام پیش کرتے ہوئے کہا کہ ان کی جرات، بہادری اور ایمان سے لبریز عزم ہماری رہنمائی کا چراغ ہے۔
