اسلام آباد: سپریم کورٹ نے عمران خان کی 8 ضمانت درخواستوں پر پنجاب حکومت کو نوٹس جاری جبکہ پراسیکیوشن ڈیپارٹمنٹ کو قانونی سوالات پر تیاری کا حکم دے دیا۔ منگل کو سپریم کورٹ میں چیف جسٹس یحییٰ آفریدی کی سربراہی میں جسٹس میاں گل حسن اورنگزیب اور جسٹس شفیع صدیقی پر مشتمل 3 رکنی بینچ نے بانی پی ٹی آئی کی ضمانت 8 ضمانت اپیلوں پر سماعت کی۔
دوران سماعت چیف جسٹس نے لاہور ہائی کورٹ کی جانب سے ضمانت درخواستیں خارج کرنے کے فیصلے پر سوالات اٹھاتے ہوئے کہا کہ ہائی کورٹ ضمانت کے کیس میں کیس کے مرکزی میرٹس پر کیسے رائے دے سکتی تھی؟۔ انہوں نے وکلا سے کہا کہ اس قانونی نقطے پر عدالت کی معاونت کریں۔
چیف جسٹس نے ریمارکس دیئے کہ سپریم کورٹ کوئی ایسی فائنڈنگ نہیں دے گی جس سے کسی کا کیس متاثر ہو، کیا ضمانت کیس میں حتمی آبزرویشنز دی جا سکتی ہیں؟۔چیف جسٹس نے کہا کہ آج صرف پراسیکیوشن کو نوٹس جاری کیا جا رہا ہے، وکلا آئندہ سماعت تک لیگل ایشوز پر تیاری کر لیں، فریقین کے وکلاء قانونی سوالات پر عدالت کی معاونت کریں تاکہ کیس کا فیصلہ میرٹ پر ہو سکے۔
بعد ازاں عدالت نے پنجاب حکومت کو نوٹس اور پراسیکیوشن ڈیپارٹمنٹ کو قانونی سوالات پر تیاری کا حکم دیتے ہوئے سماعت 19اگست تک ملتوی کردی۔
