ملتان (لارڈ میڈیا) پاکستان کے اسپن آل راؤنڈر محمد نواز دائیں ہاتھ کی درمیانی انگلی میں فریکچر کے باعث نیشنل چیمپئنز کپ سے باہر ہوگئے ہیں۔ پاکستان کرکٹ بورڈ نے ان کی انجری کی تصدیق کرتے ہوئے کہا ہے کہ نواز کم از کم تین ہفتوں تک کرکٹ سے دور رہیں گے۔
محمد نواز کو 12 اگست کو ملتان کرکٹ اسٹیڈیم میں اسپارکو پینٹس پاکستان گولڈ اور ال بطال پروڈکشنز پاکستان بلیوز کے درمیان میچ کے دوران فیلڈنگ کرتے ہوئے انگلی پر چوٹ لگی تھی۔
دلچسپ بات یہ ہے کہ انجری کے باوجود انہوں نے اپنے 10 اوورز کا کوٹہ مکمل کیا، تاہم ان کی ٹیم کو چھ وکٹوں سے شکست کا سامنا کرنا پڑا۔
نواز کے 13 اگست کو کیے گئے اسکینز میں فریکچر کی تصدیق ہوئی۔ وہ دو ہفتے بعد پی سی بی کے اسپورٹس اینڈ ایکسرسائز میڈیسن ڈیپارٹمنٹ کو رپورٹ کریں گے، جہاں طبی نگرانی میں ان کی بحالی اور میدان میں واپسی کے مراحل شروع کیے جائیں گے۔
