ہیلسنکی (شِنہوا) ہوا بازی، سیاحت اور کاروباری شعبوں کے نمائندوں نے اس امید کا اظہار کیا ہے کہ چائنہ سدرن ایئر لائنز کی بیجنگ اور ہیلسنکی کے درمیان نئی براہ راست پرواز چین اور فن لینڈ کے درمیان سیاحت، تجارتی تعلقات اور باہمی تبادلوں کو فروغ دے گی۔
ان خیالات کا اظہار ہیلسنکی میں چائنہ سدرن ایئر لائنز کی جانب سے منعقدہ ایک تقریب میں کیا گیا جو چین اور فن لینڈ کے دارالحکومتوں کے درمیان پہلی کامیاب براہ راست پرواز کے ایک روز بعد منعقد ہوئی۔
تقریب میں تقریباً 200 مہمانوں نے شرکت کی جن میں چائنہ سدرن ایئر لائنز، فن لینڈ کے ہوائی اڈے کی منتظم فناویا، فن لینڈ کے قومی سیاحتی بورڈ وزٹ فن لینڈ، فن لینڈ میں چینی سفارت خانے، مقامی حکام، ذرائع ابلاغ اور سفری و کاروباری شعبوں کے نمائندے شامل تھے۔
فن لینڈ کے شہر ہیلسنکی میں چائنہ سدرن ایئر لائنز کی جانب سے بیجنگ اور ہیلسنکی کے درمیان نئے براہ راست فضائی روٹ کی تشہیری تقریب سے چائنہ سدرن ایئر ہولڈنگ کمپنی کے ایگزیکٹو نائب صدر زینگ یونگ چھاؤ خطاب کر رہے ہیں-(شِنہوا)
تقریب سے خطاب کرتے ہوئے چائنہ سدرن ایئر ہولڈنگ کمپنی کے ایگزیکٹو نائب صدر زینگ یونگ چھاؤ نے کہا کہ یہ نئی پرواز دونوں ممالک کے درمیان سفر کو زیادہ آسان بنائے گی، کاروبار اور سیاحت کے مواقع میں اضافہ کرے گی اور مسافروں کو زیادہ سہولت اور آرام دہ سفر فراہم کرے گی۔
زینگ نے بتایا کہ یہ روٹ اتوار کے روز شروع کیا گیا ہے اور اسے بوئنگ 787 کے بڑے طیارے کے ذریعے چلایا جا رہا ہے۔ ابتدا میں یہ پرواز ہفتے میں تین بار چلائی جائے گی جبکہ 20 جون سے اسے روزانہ کی بنیاد پر چلانے کا منصوبہ ہے۔ انہوں نے مزید کہا کہ یہ روٹ نہ صرف ہیلسنکی اور بیجنگ کو جوڑتا ہے بلکہ فن لینڈ کو چین کی وسیع منڈی سے بھی منسلک کرتا ہے۔
فن لینڈ کے شہر ہیلسنکی میں چائنہ سدرن ایئر لائنز کی جانب سے بیجنگ اور ہیلسنکی کے درمیان نئے براہ راست فضائی روٹ کی تشہیری تقریب سے فناویا کے سی ای او کیمو ماکی خطاب کر رہے ہیں-(شِنہوا)
فناویا کے سی ای او کیمو ماکی نے کہا کہ یہ روٹ یورپی مسافروں کو بیجنگ اور وہاں سے چین اور ایشیا کے دیگر حصوں تک تیز اور موثر سفری رابطہ فراہم کرے گا جبکہ اس سے فن لینڈ میں مزید چینی سیاحوں کی آمد میں بھی مدد ملے گی۔
وزٹ فن لینڈ کے بین الاقوامی آپریشنز کے ڈائریکٹر تیمو آہولا نے کہا کہ اس براہ راست رابطے کا طویل عرصے سے انتظار تھا اور یہ نہ صرف سیاحت بلکہ تجارت، ثقافتی تبادلوں اور وسیع تر دوطرفہ تعلقات کو بھی فروغ دے گا۔
فن لینڈ میں چینی سفارت خانے کی قائم مقام ناظم الامور چھن ہوئی شن نے کہا کہ دونوں دارالحکومتوں کے درمیان یہ براہ راست فضائی رابطہ دوطرفہ تبادلوں میں نئی توانائی پیدا کرے گا، خاص طور پر ایسے وقت میں جب بیجنگ اور ہیلسنکی اس سال جڑواں شہروں کے اپنے تعلقات کی 20ویں سالگرہ منا رہے ہیں۔
