اقوام متحدہ (شِنہوا) اقوام متحدہ کے سیکرٹری جنرل انتونیو گوتریس نے مقبوضہ مغربی کنارے میں اسرائیلی آباد کاروں کی جانب سے فلسطینیوں اور ان کی املاک پر حالیہ حملوں کی مذمت کی ہے۔
اقوام متحدہ کے سیکرٹری جنرل کے ترجمان سٹیفن دوجارک نے روزانہ کی بریفنگ میں بتایا کہ اسرائیلی آبادکاروں کی جانب سے تقریباً روزانہ ہونے والے یہ حملے دن بہ دن زیادہ شدید ہوتے جا رہے ہیں جن کے نتیجے میں لوگ ہلاک اور زخمی ہو رہے ہیں جبکہ بڑے پیمانے پر املاک کو نقصان اور بعض اوقات پوری کی پوری آبادیوں کی بے دخلی ہو رہی ہے۔
ترجمان کے مطابق اقوام متحدہ کے سربراہ نے اس بات کو دہرایا کہ اسرائیلی بستیاں اور ان سے متعلقہ ڈھانچہ کسی بھی قانونی حیثیت کے حامل نہیں ہیں اور یہ اقوام متحدہ کی متعلقہ قراردادوں سمیت بین الاقوامی قانون کی کھلی خلاف ورزی ہیں۔ انہوں نے مقبوضہ مغربی کنارے میں صورتحال کو فوری طور پر کشیدگی سے نکالنے اور شہریوں اور ان کی املاک پر حملوں کے خاتمے کا مطالبہ بھی کیا۔
دوجارک نے مزید کہا کہ وہ اسرائیلی حکومت پر زور دیتے ہیں کہ مقبوضہ مغربی کنارے میں موجودہ صورتحال کو بدلنے کے لئے ٹھوس اقدامات کرے۔ اسرائیلی حکام پر یہ ذمہ داری عائد ہوتی ہے کہ وہ فلسطینی آبادی کا تحفظ کریں، بلا مواخذہ طرز عمل کا خاتمہ کریں اور ذمہ دار افراد کو جوابدہ ٹھہرائیں۔
