بیجنگ (شِنہوا) چین کے وزیر خزانہ لان فو آن نے اعلان کیا ہے کہ اگلے 5 سال کے دوران چین کی مالیاتی پالیسی میں کھلے پن اور مشترکہ فوائد پر زیادہ زور دیا جائے گا تاکہ دنیا بھر کے ممالک چین کی ترقی کے مواقع سے فائدہ اٹھا سکیں۔
بیجنگ میں شروع ہونے والے چائنہ ڈیویلپمنٹ فورم 2026 سے خطاب کرتے ہوئے لان نے کہا کہ سست رو عالمی معاشی صورتحال کے پیش نظر چین داخلی سطح پر ایک فعال مالیاتی پالیسی اپنائے گا جبکہ بین الاقوامی مالیاتی تعاون کو مضبوط کرے گا تاکہ عالمی معیشت میں استحکام اور مثبت توانائی پیدا کی جا سکے۔
انہوں نے مزید کہا کہ چین دوطرفہ اور کثیرالجہتی مالیاتی تعاون کو مزید گہرا کرے گا اور عالمی معاشی نظم و نسق کو بہتر بنانے میں مدد دے گا۔ چین مالیاتی اور اقتصادی ذرائع سے عالمی چیلنجز سے نمٹنے اور زیادہ ٹھوس نتائج حاصل کرنے کے لئے دیگر ممالک کے ساتھ کام کرے گا۔
وزیر خزانہ نے کہا کہ ملک میں ایک زیادہ منصفانہ، شفاف اور غیر امتیازی کاروباری ماحول تیار کیا جائے گا جس سے غیر ملکی اداروں سمیت مارکیٹ کے تمام کھلاڑیوں کو یکساں مواقع پر مقابلہ کرنے کے قابل بنایا جا سکے گا۔
22 اور 23 مارچ کو ہونے والے چائنہ ڈیویلپمنٹ فورم 2026 کا موضوع ’’چین اپنے 15 ویں 5 سالہ منصوبے کے دور میں: اعلیٰ معیار کی ترقی کا فروغ اور مل کر نئے مواقع پیدا کرنا‘‘ ہے۔
