سعودی عرب کے ولی عہد اور وزیراعظم محمد بن سلمان کی زیر صدارت ہونیوالے کابینہ اجلاس میں اہم فیصلے کئے گئے ہیں جن میں پاکستان کیساتھ مختلف شعبوں میں تعاون بڑھانے کی منظوری بھی شامل ہے، اجلاس میں کابینہ نے سعودی اور پاکستانی وزارت داخلہ کے درمیان سائنسی، تربیتی اور تحقیقی تعاون کو فروغ دینے کیلئے دو طرفہ معاہدہ پر دستخط کی اجازت دیدی ہے، اقدام کا مقصد دونوں ممالک کے سکیورٹی اور انتظامی شعبوں میں تجربات کے تبادلے کو مزید مضبوط بنانا ہے۔
کابینہ نے سعودی اور پاکستانی وزارت صحت کے درمیان ریگولیشنز، کوآرڈی نیشن اور طبی شعبے میں تعاون بڑھانے کے حوالے سے معاہدوں کی منظوری بھی دی جس سے صحت کے نظام، پالیسی سازی اور طبی سہولیات میں مشترکہ پیشرفت کی راہ ہموار ہونے کی توقع ہے۔
اجلاس کے دوران دیگر علاقائی اور عالمی امور پر بھی تبادلہ خیال کیا گیا۔
سعودی کابینہ نے پاکستان کیساتھ تعلقات کو مزید وسعت دینے کے عزم کا اعادہ بھی کیا۔
