آئی جی خیبرپختونخوا ذوالفقار حمید نے کہا ہے کہ عدالتی حکم پر سڑکیں بند کرنیوالوں کیخلاف قانون کے مطابق کارروائی کریں گے۔
پشاور ہائیکورٹ کے باہر میڈیا سے گفتگو کرتے ہوئے آئی جی خیبرپختونخوا پولیس نے بتایا کہ عدالت نے بند سڑکیں کھولنے کا حکم دیا ہے، اب سٹرکیں کھلوائیں گے، بند کرنیوالوں کیخلاف قانون کے مطابق کارروائی کی جائے گی۔
پی ٹی آئی ورکرز کی جانب سے سڑکوں کی بندش بارے سوال پر ذوالفقار حمید نے کہا کہ عدالتی حکم کے مطابق جس نے بھی سڑکیں بند کی ہیں ان کے خلاف کارروائی کی جائے گی۔
انہوں نے کہا کہ بدامنی بڑا چیلنج ہے، پولیس اس کے تدارک کیلئے بھرپور کوششیں کر رہی ہے۔
انہوں نے عوام سے اپیل کی کہ وہ سڑکوں کی بندش جیسے اقدامات سے گریز کریں اور ازخود بند راستے کھول دیں تاکہ شہر میں امن و امان قائم رہے اور معمولات زندگی متاثر نہ ہوں۔
