پاکستان کی جانب سے ٹی ٹونٹی ورلڈ کپ میں بھارت کیخلاف میچ کھیلنے سے انکارپر پریشان آئی سی سی نے معاملہ سلجھانے کیلئے تگ و دو شروع کردی ہے اور پاکستان کو آمادہ کرنے کیلئے ڈپٹی چیئرمین عمران خواجہ کو ٹاسک سونپ دیا گیا ہے۔
غیر ملکی میڈیا کے مطابق عمران خواجہ پاکستان سے بیک ڈور رابطوں کے ذریعے بات چیت اور پیس میکر کا کردار ادا کرینگے، پاکستان اور بھارت کا میچ نہ ہونے پر 70ارب کے نقصان کا خدشہ ہے، دونوں ممالک میں میچ 15 فروری کو کولمبو میں شیڈول ہے۔
دوسری جانب آئی سی سی اور بی سی سی آئی کے گٹھ جوڑ پر عالمی سطح پر بھی آوازیں بلند ہونا شروع ہو گئیں۔
اس سلسلے میں سابق انگلش کرکٹر مارک بوچر کا کہنا ہے کہ چیمپئنز ٹرافی میں بھارت کیلئے خصوصی انتظام کیا گیا، بنگلا دیش کو دوسرے وینیو پر کھیلنے کی اجازت نہیں دی گئی جبکہ بھارت جہاں چاہتا ہے کھیلتا ہے، مارک بوچر نے پاکستان کے فیصلے کی بھی تعریف کی اور کہا کہ ماننا پڑیگا پاکستان نے اس دفعہ بڑا زبردست کام کیا، پاکستان کے پاس بھارت اور آئی سی سی پر دباؤ ڈالنے کا واحد موقع تھا، پاک بھارت میچ دنیا کا سب سے زیادہ منافع بخش مقابلہ ہوتا ہے۔
