بالی ووڈ اداکار گووندا نے دعویٰ کیا ہے کہ انکے بھانجے کرشنا ابھیشک کو میرے خلاف استعمال کرکے میری توہین کرنے پر مجبور کیا جاتا ہے۔
گووندا کی اہلیہ سنیتا آہوجا نے حال ہی میں اپنے شوہر پر سنگین الزامات عائد کئے تھے جس کے بعد گووندا نے ان بیانات کو ایک بڑے تنازع کا حصہ قرار دیا۔
غیر ملکی میڈیا رپورٹس کے مطابق ایک انٹرویو میں سنیتا نے انکشاف کیا تھا کہ مبینہ طور پر ان کے شوہر ایک ایسی خاتون کیساتھ منسلک تھے جو اداکار سے پیسے چاہتی تھی، اس معاملے پر خاموشی توڑتے ہوئے گووندا نے دعویٰ کیا کہ انکی اہلیہ اور قریبی لوگ ان کیخلاف ایک بڑی سازش میں استعمال ہو رہے ہیں۔
گووندا نے اس معاملے میں اپنے بھانجے اداکار وکامیڈین کرشنا ابھیشیک کو بھی گھسیٹ لیا اور الزام عائد کیا کہ کرشنا کو ٹی وی پر انکی توہین کرنے پر زبردستی مجبور کیا جاتا ہے۔
گووندا نے ایک انٹرویو میں کہا کہ اگر آپ کرشنا ابھیشیک کے ٹی وی پروگرامز دیکھیں تو آپ محسوس کرینگے کہ مصنفین اسے ایسے جملے کہلواتے ہیں جو میری توہین کرتے ہیں، میں نے اسے بتایا کہ اسے میرے خلاف استعمال کیا جا رہا ہے اور اسے محتاط رہنے کو کہا ہے، جب بھی میں نے کرشنا کو خبردار کیا، سنیتا ناراض ہو جاتی تھیں اور مجھے یہ بھی نہیں معلوم کہ یہ لوگ کب ایک دوسرے سے ناراض ہوتے ہیں اور کب ٹھیک ہو جاتے ہیں۔
اداکار نے اپنے خاندان کے افراد سے درخواست کی کہ وہ عوامی بیانات دینے سے گریز کریں، میری زندگی میں ایسے حالات پیدا نہ کئے جائیں جو مجھے گھٹن میں مبتلا کر دیں۔
