امریکا کی ایران مخالف اقدامات کا سلسلہ جاری ہے اور اس میں ایک نئے باب کا اضافہ ہوا ہے جب امریکہ کی ایموری یونیورسٹی نے ایرانی سپریم نیشنل سکیورٹی کونسل کے سیکرٹری علی لاریجانی کی بیٹی فاطمہ اردشیر لاریجانی کو ملازمت سے برطرف کر دیا ہے۔
غیر ملکی میڈیا کے مطابق فاطمہ لاریجانی ایموری یونیورسٹی میں اسسٹنٹ پروفیسر کے طور پر خدمات انجام دے رہی تھیں اور ہیماٹولوجی اور میڈیکل آنکولوجی کے مضامین پڑھا رہی تھیں۔
ایموری یونیورسٹی کے ون شپ کینسر انسٹی ٹیوٹ نے تصدیق کی ہے کہ فاطمہ لاریجانی اب ادارے کی ملازم نہیں رہیں تاہم اس فیصلے کی وجوہات سے متعلق مزید تفصیلات فراہم نہیں کی گئیں۔
واضح رہے کہ چند روز قبل امریکی ایوان نمائندگان کے رکن ارل کارٹر نے یونیورسٹی انتظامیہ کو ایک خط ارسال کیا تھا جس میں فاطمہ لاریجانی کو ملازمت سے برطرف کرنے اور انکا میڈیکل لائسنس منسوخ کرنے کا مطالبہ کیا گیا تھا، اس پیشرفت کے بعد یونیورسٹی کی جانب سے یہ اقدام سامنے آیا ہے۔
