روسی صدر ولادیمیر پیوٹن نے کہا ہے کہ عالمی صورتحال مسلسل بگڑ رہی ہے، اس وقت انسانیت کو ضرورت ہے کہ ممالک کے درمیان زیادہ تعاون ہو۔
ماسکو میں نئے سفیروں کی اسناد پیش کرنے کی تقریب سے خطاب کرتے ہوئے پیوٹن نے اس روسی موقف کو دہرایا کہ عالمی سلامتی کا ڈھانچہ نئی بنیادوں پر استوار ہونا چاہئے اور اس حوالے سے روس کی پیش کردہ تجاویز پر دوبارہ سنجیدہ بات چیت ہونی چاہئے۔
انہوں نے کہا کہ دنیا میں طاقت کے زور پر یکطرفہ اقدامات بڑھ رہے ہیں، سفارتکاری، مکالمہ اور سمجھوتہ پس منظر میں جا رہے ہیں، بعض ممالک دوسروں کو یہ بتانے کی کوشش کر رہے ہیں کہ انہیں کیسے جینا ہے، کونسے فیصلے کرنے ہیں اور کس سمت جانا ہے۔
روسی صدر نے زور دیا کہ بین الاقوامی قانون پر عملدرآمد یقینی بنانے کیلئے عالمی سطح پر زیادہ مضبوط مطالبہ کی ضرورت ہے تاکہ دنیا زیادہ منصفانہ اور کثیر قطبی نظام کی طرف بڑھ سکے، روس ایک کثیر قطبی دنیا کے نظریہ سے مخلص ہے اور اپنی خارجہ پالیسی ہمیشہ توازن اور تعمیری سوچ کیساتھ وضع کرتا ہے جس میں روس کے قومی مفادات اور عالمی رجحانات دونوں کو مدنظر رکھا جاتا ہے۔
انہوں نے واضح کیا کہ روس تمام ممالک کیساتھ کھلے اور باہمی فائدے پر مبنی تعلقات چاہتا ہے اور سیاست، معیشت اور انسانی شعبوں میں تعاون کو گہرا کرنے کیلئے تیار ہے، انہوں نے اقوام متحدہ کے مرکزی کردار کی ضرورت پر بھی زور دیا اور کہا کہ اقوام متحدہ کے منشور کی اہمیت آج پہلے سے زیادہ ہے، سلامتی کسی ایک ملک کیلئے دوسرے کی قیمت پر قائم نہیں ہو سکتی، یہ اصول بین الاقوامی معاہدوں میں واضح طور پر درج ہے اور اس سے انحراف ہمیشہ نقصان دہ ثابت ہوا ہے، روس نے یورپی اور عالمی سلامتی کے نئے ڈھانچے کے حوالے سے کئی تجاویز پیش کی تھیں اور اب وقت ہے کہ ان پر دوبارہ سے بامقصد گفت و شنید ہو تاکہ یوکرین تنازع کے سیاسی حل کی بنیاد رکھی جا سکے، ان کے مطابق یوکرین کا بحران روس کے جائز سکیورٹی خدشات کو مسلسل نظرانداز کرنے اور نیٹو کے روسی سرحدوں تک پھیلائو کا نتیجہ ہے، روس دیرپا امن چاہتا ہے مگر ہر جگہ خصوصا کیف اور اسکے حامی دارالحکومتوں میں ابھی ایسی آمادگی نہیں، امن جلد از جلد قائم ہونا چاہئے تاہم روس اپنے مقاصد حاصل کرنے کیلئے ثابت قدم رہے گا، یورپی ممالک کیساتھ تعلقات کی موجودہ حالت تسلی بخش نہیں تاہم روس باہمی فائدے پر مبنی تعاون کیلئے ہر ملک کیساتھ تیار ہے۔ کیوبا اپنی خودمختاری کیلئے ثابت قدم ہے ۔
