وفاقی وزیر احسن اقبال نے کہا ہے کہ 2022میں ڈیفالٹ کرتے ملک کی ریکوری حیرت انگیزہے، 38 فیصد کے حساب سے اوپر جاتی مہنگائی 4 فیصد پر آچکی ہے، ایکسپورٹ صلاحیت بڑھانے والے سیکٹرز پر ڈیوٹیز کم کی ہیں۔
نجی ٹی وی سے گفتگو کرتے ہوئے احسن اقبال نے کہا کہ 2022میں جب حکومت میں آئے تو فون کر کے ایل سی کھلوانی پڑتی تھی، اس وقت ہم اندرونی طور پر تقریبا ڈیفالٹ ہوچکے تھے،یکم اپریل 2022ء کو وزارت خزانہ نے ہاتھ کھڑے کرتے ہوئے کہا تھا کہ ترقیاتی بجٹ کی آخری سہ ماہی کی قسط جاری نہیں کریں گے، اس وقت ہم جہاں آگئے ہیں یہ حیرت انگیز ریکوری ہے۔
انہوں نے کہا کہ آئی ایم ایف کیساتھ ہمارا پروگرام 2027ء تک ہے، فچ، اسٹینڈرڈ اینڈ پور، موڈیز نے پاکستان کی ریٹنگ کو اپ گریڈ کیا ہے، مہنگائی 38فیصد کے حساب سے اوپر جارہی تھی جو آج 4 فیصد پر آگئی ہے۔
انہوں نے کہا کہ لارج سکیل مینوفیکچرنگ بڑھ رہی ہے، ہم تجارتی خسارے کو روکیں گے۔ انہوںنے کہا کہ بجٹ کے اندر ایکسپورٹ کی صلاحیت بڑھانے والے سیکٹرز پر ڈیوٹیز کو کم کیا گیا ہے، یہ اقدام مشینیں ملک میں لانے کیلئے اٹھایا گیا تاکہ ایکسپورٹ بڑھانے کی صلاحیت بڑھے۔
انہوں نے بتایا کہ سکھر حیدرآباد موٹر وے 2028تک مکمل ہو جائے گا۔
